Kryeministri i Serbisë, Aleksandar Vuçiç, ka komentuar me tone të ashpra Unionin e Komunave Shqiptare në rajon, të krijuar së fundmi. Ai e cilësoi këtë union si “lojë fëmijësh”, e rrezikshme dhe jo serioze.
“Çfarë komunash shqiptare! Këto janë lojëra për fëmijë të vegjël. Ky është tregim për votuesit e tyre. E çfarë bën ai union? Shtyp flamuj dhe lapsa.”, është shprehur ndër të tjera Aleksandar Vuçiç në konferencën për mediat.
Ai theksoi se me krijimin e këtij unioni në Preshevë nuk ka ndryshuar gjë dhe duke qenë se e cilëson “lojë fëmijësh”, nuk është shqetësuar shumë. Megjithatë, në aspektin psikologjik mund të cilësohet i rrezikshëm pasi “disa njerëzve, mund t’u duket se kanë bërë diçka të madhe dhe nga ana tjetër, kjo sigurisht ndikon negativisht në marrëdhëniet mes vendeve të Ballkanit Perëndimor.”
Unioni i Bashkive dhe Komunave Shqiptare në rajon synon krijimin e mekanizmave të duhur të bashkëpunimit mes qyteteve shqiptare. Ai ka startuar me Bashkinë e Tiranës, Prishtinës, Tetovës, Ulqinit dhe Preshevës, të cilat kanë firmosur një platformë bashkëpunimi në fusha si urbanistika, mjedisi, arti dhe inovacioni.
