Mëngjesin e sotëm, 30 forca të ushtrisë shqiptare i janë bashkuar operacionit për shuarjen e zjarrit në zonën e Drenovës, në bashkëpunim me shërbimet zjarrfikëse dhe ato bashkiake.
Vatra e zjarrit vijon të jetë aktive dhe është shtrirë në një sipërfaqe të madhe pyjore, duke përfshirë një pjesë të konsiderueshme të pyllit me pisha.
Për shkak të terrienit të thepisur dhe të paarritshëm për automjete, forcat në terren po punojnë me mjete rrethanore, ndërsa ndërhyrja nga ajri mbetet e domosdoshme për të frenuar përhapjen e mëtejshme të flakëve.
Autoritetet lokale janë në gadishmëri për të garantuar sigurinë e banorëve, pasi zjarri ndodhet jo shumë larg zonave të banuara. Për momentin nuk raportohet për të lënduar, por rreziku për përhapje të mëtejshme është i lartë për shkak të erës dhe temperaturave të larta.
Bashkia Mallakastër dhe Emergjencat Civile u bëjnë thirrje qytetarëve që të shmangin lëvizjet pranë zonës së zjarrit dhe të raportojnë çdo vatër të re për të ndihmuar në koordinimin e operacionit.
