Nëna nga Vlora akuzon mjekun për gjendjen e rënduar shëndetësore të vajzës së saj Stelinës, ndërsa ky i fundit ia hedh fajin infermierit.
Klementina Barjamaj, u ankua në emisionin Fiks Fare për stafin mjekësor të qendrës shëndetësore të Vllahinës. Sipas saj, një injeksion në krah i ka kushtuar shtrenjtë të bijës 16-vjeçare, e cila rrezikon t’i pritet krahu.
Injeksioni për alergji që i ka bërë infermieri i ka shkaktuar plagë në krahë. Madje edhe mjekimi që ka marrë për plagën ka qenë i dëmshëm, duke ia acaruar dhe zmadhuar më shumë përmasat e saj duke e çuar plagën në nekrozë.
“Ankohem te Fiks Fare për vajzën time, e cila kishte shenja helmimi dhe e dërguam në muajin gusht në qendrën shëndetësore të fshatit Vllahinë” tregon Klementina, duke shtuar se infermieri i qendrës, Dushan Hysenaj, i ka bërë një injeksion, “Kalcium Glukonat”, me urdhrin e mjekut të qendrës.
Familja e të miturës denoncoi rastin në prokurori, por procedimi u pushua me arsyetimin se nuk ka elementë të veprës penale.
Për të vërtetuar fjalët e nënës, kamera e Fiksit ka shkuar në qendrën shëndetësore në fshatin Vllahinë në Vlorë, ku gjetën mjekun që ka autorizuar injeksionin si dhe infermierin që e bëri dhe e mjekoi më pas plagën.
Sipas mjekut Nasho Zani, plaga është shkaktuar nga mënyra si është bërë injeksioni. Sipas tij, mund të ketë rënë një pikë ilaçi jashtë venës që shkaktoi plagën.
Pasta jai shton se nuk ka qenë në dijeni të pomadës që I është vendosur vajzës në krah, e cila e ka përkeqësuar gjendjen e saj.
Ndërsa infermieri që e ka vendosur pomadën në krahun e vajzës është shprehur: “Unë nuk e dija që bën keq, nuk e dija çfarë ishte”.
Vajza, pasi u mjekua për disa ditë në qendrën shëndetësore në Vllahinë, po merr mjekimin në QSUT, në Spitalin e Djegies Plastike. (D.D/Shuplaka)
