Deputeti socialist Anastas Angjeli, në një lidhje të drejtpërdrejt me studion e lajmeve të televizionit FaxNews, ka folur në lidhje me buxhetin e vitit të ardhshëm dhe fondet që janë rialokuar për betejën kundër pandemisë. Angjeli u ndal dhe në një pikë tjetër të rëndësishme, e cila është sigurimi i vaksinës anti-Covid nga ana e qeverisë shiptare.
Deputeti u shpreh se tashmë Shqipëria ka parapaguar një shumë prej 1.5 miliardë lekësh, tek një nga kompanitë prodhuese të vaksinës dhe do të sigurojë 1.4 milionë doza. Ai thekson se shpërndarja e vaksinave mund të filloj me shumë gjasa në fillim të vitit të ardhshëm.
“Lajmi i mirë në gjithë botën është se 2 kompani kanë siguruar prodhimin e vaksinës me një siguri 90% deri në 94.5%. Gjë që shumë shtete kanë bërë që të kontribojnë paraprakisht dhe të lidhin kontrata për të për të garantuar sigurimin e vaksinës. Shqipëria është një nga ato shtete që kontriboi dhe ka paguar paradhënie 1.5 miliardë lek që sigurojnë 1.4 milionë vaksina. Ato besoj do të jenë të pranishme në fillim të vitit tjetër, pjesë pjesë, ashtu sikurse ka filluar dhe furnizimi i shteteve sipas kontratës nga prodhuesit te blerësit e tyre”, tha Angjeli.
Discussion about this post