Ditët e fundit në vendin tonë janë shtuar shumë rastet e fëmijëvë që janë prekur nga sëmundja e fruthit. Mes prindërve ka nga ata që mendojnë se kjo vaksinë shkakton autizëm.
“Unë jam e bindur se vaksinimi është proces i dëmshëm, sepse e kam pësuar me fëmijën e dytë me vaksinën e fruthit, për këtë arsye fëmija im është dëmtuar, ka kaluar autizëm.
Dhe unë nuk dua ta kaloj me të njëjtën situatë me fëmijën e tretë apo të katërt. Analizat që i bëra djalit tim në Itali, doli i intoksikuar me mërkurë shumë të lartë”, shprehet Monda Qyshka, nënë e disa fëmijëve.
Mjekja e njohur Liri Berisha, e cila prej vitesh merret me çrregullimin e spektrit autik te fëmijët, e hedh poshtë me forcë këtë argument në një intervistë për ’’TCH”.
“Polemikat për vaksinën, sikur vaksina e fruthit shkakton autizëm kanë qenë të shumta. Personalisht duke e parë në këndvështrimin tim si mjeke fillimin e përdorimit të vaksinës do ta konsideroja një revolucion të vërtetë. Jam e bindur se vaksina e fruthit nuk e jep këtë çrregullim.
Ka shumë fëmijë autik jo vetëm në Shqipëri, por në mbarë botën që nuk janë vaksinuar dhe kanë autizëm. Ndaj i bëj nënave një mesazh që kush nuk e ka bërë vaksinën e fruthit të vrapojë e ta bëjë me patjetër, është e domosdoshme”, shprehet Liri Berisha, Pediatre/Kryetare e Fondacionit të Fëmijëve Shqiptarë.
E megjithë kundërshtitë e prindërve, në Drejtorinë arsimore Tiranë duken të vendosur të zbatojnë ligjin, që ndalon frekuentimin e institucioneve arsimore dhe paraarsimore nga fëmijë të pavaksinuar.
Vendet e Bashkimit Europian apo edhe Shtetet e Bashkuara të Amerikës kanë regjime të ndryshme për vaksinat, por zakonisht fruthi futet te vaksinat e detyrueshme apo fort të këshillueshme.
(E.K/FAXWEB)
