Pas përfundimit të mbledhjes së Këshillit Politik, përfaësuesi i PD-së për Reformën Zgjedhore, Oerd Bylykbashi i ka kthyer përgjigje të prerë sot bashkëkryetarit të Komisionit, Damian Gjiknurit, duke thënë se cështjet e shtruara nga opozita e bashkuar, janë mbi tavolinë dhe është shumica që vetëm ka refuzuar.
“Në këtë mbledhje siç kishim kërkuar u përcaktua që Këshilli Politik ta mbyllë brenda 31 majit, objektiv i opozitës është që të shkojë drejt mbylljes me konsensus të një drafti që Kuvendi ta miratojë pa ndryshime.
Ajo që ngulëm këmbë është që të jetë e qartë, cili është vullneti i shumicës për opozitën e bashkuar për çështjet madhore që ka drafti dhe propozimet konkrete mbi tryezë. Ne do t’i qëndrojmë fort nevojës për zgjidhje konsensuale me asistencën e ODIHR që brenda 31 majit reforma të mbyllet”- tha ai.
Sipas tij, opozita do shprehjen e qartë nga shumica, cili është vullnti i saj politik. “Ne nuk i rikthehemi asnjë çështje, ato janë mbi tryezë, është ajo që nuk ka dhënë asnjë përgjigje lidhur me çështjet e shtruara veç refuzimeve të menjëhershme, është mirë që shumica të vijë me qëndrime lidhur me këto. Nuk shtrohen çështje pa zgjidhur ato që janë themeli, loja e shumicës për të tërhequr zvarrë me cështje shtesë nuk ndihmon procesin, por jemi të gatshëm që të ecim përpara”- tha ai.
Nga ana tjetër përfaësuesi i LSI-së, Petrit Vasili në Këshillin politik paralajmëroi mazhorancën që të heqë dorë iluzioni për ta votuar të vetëm Reformën Zgjedhore.
“Propozimet, çdo tendencë nga ana e mazhorancës për të akumuluar çështje që zënë përfund njëra- tjetrës është në funksion për ta vënë situatës për të shkruar drejt provokimeve. Konsensualiteti nuk i është bërë asnjë shërbim nga mazhoranca, se refuzimet kanë qenë kategorike. Mazhoranca të heq dorë nga miratimi në një mënyrë të njëanshme apo me vota të blera, pasi do thellonte në ekstrem krizën politike. Të gjitha draftet e opozitës ezaurojnë rekomandimet e OSBE/ ODIHR. Reforma nul nëse është pa opozitën, krizë politike që vetëm ka përparuar. Do përballej me pasoja shumë të rënda”, tha Vasili.
