Vasili i përvishet Ramës: Parazitoi katër vjet, tani u kujtua për Akademinë e Shkencave

Petrit Vasili ka reaguar lidhur me situatën e krijuar në Akademinë e Shkencave, për të cilën kryeministri Edi Rama kërkoi prerjen e fondeve.

Vasili kujton se kryeministri Rama është i njëjti kryeministër që ka qenë në katër viteve të shkuara, mirëpo vetëm pas zgjedhjeve për kryetarin e ri është kujtuar për Akademinë e Shkencave.

“Kryeministri parazitoi katër vjet, tani u kujtua për Akademinë e Shkencave.

Kryeministri i ri nuk po lodhet së diskredituari kryeministrin e vjetër të zgjedhur në 2013-n. Kryeministri i vjetër, si turist i thekur që ishte, nuk pati asnjë minute kohë për të humbur me reformimin e Akademisë së Shkencave. S’pati asnjë minutë kohë as të lexonte çfarë sugjeroi komisioni i ngritur prej tij në 2013-n, për reformimin e akademisë.

Katër vjet vegjetoi kryeministri i vjetër dhe tani u ngrit ky kryeministri i ri dhe po i tregon vendin atij shkollëpaktit, që e la reformimin e akademisë në mes të udhës. Kryeministri u kujtua vetëm ditën e zgjedhjeve dhe e kërcënoi me rrethim, me nxjerrje nga godina dhe me heqje të parave.

Çdo shfajësim për këtë parazitizëm shtetëror kryeministror katërvjeçar është turp, vizion që urren shkencën dhe inkuizicion obskurantist mesjetar.”, shkruan Vasili.

Kujtojmë se një ditë më parë me 1 kandidat të vetëm Gudar Beqiraj u zgjodh për herë të dytë kryetar i Akademisë së Shkencave.

Akademikët që votuan nuk ishin përballë një zgjedhje pasi Beqiraj ishte kandidati i vetëm i kësaj gare. Pasi i kërcënoi akademikët fillimisht, kryeministri Rama vendosi t’u ndërpriste fondet. (D.D/Shuplaka)