Ministri i Drejtësisë Petrit Vasili është i paqartë për rolin dhe ligjshmërinë e Bordit të menaxhimit të Operacionit Ndërkombëtar të Monitorimit (OMN). Këtë shqetësim ai e ka ngritur në një letër dërguar kreut të Kuvendit Ilir Meta, presidentit Bujar Nishani, kryeministrit Edi Rama, ambasadores së BE-së Romana Vlahutin dhe ambasadorit të SHBA-së Donald Lu.
Në këtë letër, Vasili thekson se Ministria e Drejtësisë nuk është vënë në dijeni për këtë bord edhe pse është vlerësuar si një nga aktorët e rëndësishëm për implementimin e reformës në drejtësi.
“Në të gjitha dispozitat qoftë kushtetuese apo ligjore nuk ka asnjë përcaktim mbi ngritjen e një Bordi të Menaxhimit të ONM. Në komunikimin e datës 7 shkurt 2017, janë caktuar 3 ekspertë të vendeve anëtare të Bashkimit Europian dhe 2 ekspertë të SHBA. Caktimi i këtyre ekspertëve është në respektim të plotë të kërkesave të Kushtetutës dhe ligjit sa i takon proçesit të rivlerësimit kalimtar të gjyqtarëve dhe prokurorëve, pasi këta do të jenë organi i ngarkuar që so të realizojnë vëzhgimin e pavarur.
Ndërkohë qeveria shqiptare ka detyrimin të vërë në dispozicion të tyre gjithçka duke filluar nga informacioni i plotë ligjor e dokumentar, deri në garantimin e mjeteve logjistike. Çdo parashikim tjetër sa i takon Bordit të Menaxhimit të Operacionit Ndërkombëtar të Monitorimit, përbërjes, rolit të tij të paqartë në këtë proçes, anëtarësisë së tij me pjesmarrës të përkohshëm si dhe përfshirja brenda tij të përfaqësuesve të Ambasadave respektive, nuk gjejnë mbështetje qoftë në Kushtetutë apo në ligj”, thuhet në letër. (D.D/Shuplaka)
Discussion about this post