Vasili në Konferencë: Vendi për herë të parë do ketë opozitë, këto ishin zgjedhjet më të shëmtuara. Si u përdor policia për të përhapur terrorin

Kreu i LSI-së Petrit Vasili ka dalë në një konferencë për mediat. LSI-ja deri më tani ka arritur të sigurojë në rang vendi 19 mandate, ndërkohë që PS-ja duket se po shkon e vetme drejt qeverisjes me 74 mandate.

Vasili u shpreh se për herë të parë vendi do të mund të ketë një opozitë të vërtetë. Sipas tij zgjedhjet e së dielës ishin më të shëmtuarat në historinë e vendit. 

Ai ka vijuar më tej duke thënë se Policia e shtetit u përdor për të mbjellë terrorin në vend dhe për të blerë votat. 

“Në rradhë të parë dhe mbi çdo gjë dua të falenderoj mbi 230 mijë votues shqiptarë, në rradhë të parë mijëra e mijëra të rinj që ishin forca jonë në këtë fushatë të vështirë që ishin motive ynë. Ata votuan për të pasur një opozitë të vërtetë në këtë vend.

Kjo rrjedh nga një shkak madhor, sepse zgjedhjet e 25 Qershorit u lëshuan miliona para të pista, kur policia ndikoi për terrorin, 230 mijë vota ishin goditja më e rëndë që shqiptarët mund ti jepnin. Për herë të parë pas katër viteve mijëra shqiptarë do të kenë zërin e tyre në Kuvend.

Tentativa blerje vote që janë fotografuar dhe që do të bëhen publike në mbarë botën, por sidomos brenda vendit. Një vend që do të çlirohet nga vjedhjet qindra milionëshe në koncesione, nga droga, të gjitha këto që ishin pa zë, qytetarët do të kenë një opozitë të vërtetë, jo të blerë dhe që do të jenë zëri i tyre, duke qëndruar përballë bandave.

Këto kanë qenë zgjedhjet më të shëmtuara, me vjedhje që i kemi dokumentuar, për ne kryesore dhe mbi çdo gjë është që shqiptarët të dinë të gjitha ato që kanë ndodhur, kjo strategji e kordinuar me kapjen nga ana e policisë së shtetit e cila tani e tutje do të quhet dhe policia e drogës.

Më së fundi po ju them në mënyrë të prerë që 230 mijë votat janë një mision që i ngarkohet LSI-së, një mision që kërkon të zhdukë bandat e nacional socialistëve që bashkë me mekanizmin e gestapos “Task-forcës” kërkonin që të dëmtonin LSI-në.

Ne nuk do ti ndahemi 24 orë këtij misioni. Ne do të mbështesim jo vetëm të ardhmën e të rinjve po të gjithë shqiptarëve”, u shpreh Vasili.

(E.K/SHUPLAKA)