Vasili për ligjin e mbetjeve: Vota jonë nuk do jetë kundër vullnetit qytetar

Kreu i grupit parlamentar të LSI-së, Petrit Vasili ka folur sonte për ligjin e importit të mbetjeve.

I ftuar në emisionin “Një natë me Xhaxhiun”, Vasili u shpreh se LSI nuk do të shkojë kundër vullnetit dhe shqetësimit qytetar, duke nënkuptuar se nuk është dakort me miratimin e këtij ligji. Megjithatë ai nuk e deklaroi hapur votën e tij.

 “Së pari unë besoj duhet të jetë të enjten por komisioni përkatës nuk e ka marrë në shqyrtim. Unë vetë e kam të qartë çështjen. Jam përpjekur që idenë e qartë që kam ta bashkëndaj edhe me grupin parlamentar. Shqetësimi publik duhet adresuar pasi është i motivuar. Shqetësim që struktura e shtetit tonë jo gjithmonë i jep përgjigje. Vendimet në kushtet e mosbesimit nuk janë vendime të mira. Kjo frymë do prijë vendimin tonë. Shqetësimi ynë është shqetësimi qytetar. Ne nuk do i shkojmë kundër vullnetit të shqetësimit qytetar. Votën nuk mund ta them publikisht për të ruajtur integritetin e institucionit”, u shpreh Vasili.

Ndër të tjera Vasili foli edhe për akuzat e PD-së ndaj deputetit të LSI-së, Shkëlqim Selami, se është dënuar në Itali për trafik qeniesh njerëzore dhe ka fshehur dosjen e tij kriminale.

Ai u shpreh se nëse kjo është e vërtetë, ai apo kushdo tjetër nuk mund ta përfaqësojë më LSI-në.

 “Kam mbajtur një qëndrim që nuk i ndryshoj asnjë presje. Nuk negociojmë me dekriminalizimin. Në rast se deputeti në fjalë ka rekorde që janë të papërputhshme me ligjin e dekriminalizimit, prokuroria dhe institucionet të ecin përpara me hetimin, ai nuk mund të përfaqësojë më LSI-në. Kushdo qoftë ai, ne jemi investuar shumë për ligjin e dekriminalizimit, ka qenë dhe mbetet prirja jonë. Pa dekriminalizim nuk mund të ketë as reformë në drejtësi.”, deklaroi Vasili. (D.D/Shuplaka)