Ministri i ri i Drejtësisë Petrit Vasili i ka dërguar një letër ambasadores së BE në vendin tonë Romana Vlahutin në lidhje me disa deklarata të drejtueses së Operacionit Ndërkombëtar të Monitorimit, Genoveva Ruiz-Calavera.
Në këtë letër ministri Vasilit kërkon që të saktësohen disa deklarata të Genoveva Ruiz-Calavera në lidhje me ONM-në dhe PMU-në(Project Menagement Unit) për Vettingun. Sipas ministrit Vasili, funksionimi i PMU-së duket të përcaktojë qartë komunikimin e kësaj strukture me institucionet shqiptare, akreditimin e vëzhguesve ndërkombëtarë, rregullat e pajisjes së tyre me certifikatat e sigurisë dhe mënyrën e komunikimit.
“Krijimi i një PMU-je (Project Menagement Unit) për projektin IPA për rivlerësimin kalimtar të prokurorëve dhe gjyqtarëve (vettingu) krijon një kornizë të karakterit organizativ dhe mund të vlerësohet si hapi i parë i dobishëm për zbatimin e vettingut. Së dyti, në sqarimin e znj. Calavera shfaqet termi i ri i strukturës ‘Governing Board’, ndërkohë që në prezantimin e mëparshëm të datës 7 shkurt 2017 kjo strukturë emërtohej ‘Menagement Board’ dhe nuk ka asnjë shpjegim për këtë ndryshim të emërtimit pasi në vlerësimin tonë ndryshimi i emërtesës logjikisht lidhet edhe me mënyrën e funksionimit të tij, apo rolit që ai do ketë konkretisht në proçes” thotë Vasili.
Letra e ministrit të Drejtësisë Petrit Vasili u është dërguar për dijeni edhe ambasadorit amerikan Donald Lu, Presidentit Nishani, kryetarit të Kuvendit Meta dhe Kryeministrit Rama. (M.D/ Shuplaka)
Discussion about this post