Partia Socialiste tashmë ka ndezur motorët e fushatës për zgjedhjet e ardhshme parlamentare, ku synon që të fitojë një mandat të tretë.
E ftuar në Fax News deputetja e Partisë Socialiste, Vasilika Hysi, tha se kjo parti ka të gjithë të drejtë morale për të kërkuar një mandat të tretë pasi ka nisur një sërë reformash për zhvillimin e vendit, të cilat kanë nevojë që të konsolidohen dhe të thellohen edhe më tej.
“Të kërkosh mandatin e tretë është mëse normale, për çdo forcë që është në pushtet, por në mënyrë të veçantë për PS-e cila në dy mandatet e mëparshme ka ndërmarrë një sërë reformash të thella, të nevojshme për qytetarët dhe për Shqipërinë të cilat kanë nevojë të konsolidohen por edhe të thellohen më tej.
Mjafton që të bëjmë një bilanc për qeverisjen e Rama1 dhe Rama 2 për të kuptuar që PS është një forcë e cila ndërmerr reforma shumë të thella, herë-herë dhe të dhimbshme, por të domosdoshme për vendin, për mirëqenien edhe për integrimin e Evropian. Prandaj në këtë kuadër ku ne kemi ndërmarrë Reforma, jo vetëm për vendin që e çojnë drejt integrimit, por para së gjithash fuqizojnë ekonominë, rrisin mirëqenien e qytetarëve dhe besoj se kemi të gjithë të drejtën morale për të kërkuar një mandat të tretë dhe për të luftuar. Jam e besim plotë që në Shqipëri në datën 25 prill do të kemi një qeveri me një mandat të tretë të qeverisë socialiste.”- tha Hysi.
E pyetur për “kundërshtarët e padukshëm”, Hysi tha se qytetarët janë tradhtuar nga PD, duke shtuar se po keqpërdorin pandeminë për të bërë politikë.
“Ne luftojmë për të arritur rezultate sa më të mira, ashtu siç edhe kundërshtari ynë. Është e drejtë që kundërshtari është i padukshëm. Kundërshtari ynë ka braktisur zgjedhësit që e votuan në vitin 2017. Kjo forcë politike në momente të rëndësishme të vendit ka krijuar gjithmonë pengesa për reformat e vendit.
Pengesa që solli opozita jashtëparlamentare ishin të mëdha. Zgjedhësit janë tradhtuar nga kjo forcë politike. Edhe tani për çështjen e pandemisë, ato duhet të punojnë së bashku me ne për të adresuar një sërë problemesh, por e ka keqpërdor për arsye aspak të dobishme për shoqërinë.”- tha Hysi.
