Policia e Kosovës mësohet po vazhdon hetimet për ndriçimin e sulmit ndaj ish gazetares, Arbana Xharra, e cila u sulmua dhe u rrah nga persona ende të panjohur në hyrje të apartamentit të saj në Prishtinë.
Policia ende nuk ka dijeni për autorët apo motivet e mundshme të sulmit që u dënua në shkallë të gjerë në Kosovë, shkruan VOA.
Xharra është trajtuar në spitalin e Prishtinës para se të lirohej për t’u trajtuar në shtëpi.
Ambasadori i Shteteve të Bashkuara të Amerikës në Kosovë, Delawie, u shpreh i tmerruar me sulmin ndaj Xharrës duke shfaqur shpresën se përgjegjësit do të vihen shpejt para drejtësisë.
Presidenti i Kosovës, Thaçi, shprehu shqetësimin e tij me këtë sulm. Në reagimin e tij ai thekson se është krejtësisht i papranueshëm dhe i dënueshëm përdorimi i dhunës.
Kryeministri Mustafa tha se sulmi mbi Arbana Xharrën është akt i ulët dhe i turpshëm.
Arbana Xharra la gazetarinë duke iu bashkuar Partisë Demokratike të Kosovës. Vendimi i saj, që u mor një ditë para se të binte qeveria dhe të shpërndahej parlamenti, nxiti debate të gjera në rrjetet sociale.
E njohur për kritikat ndaj zyrtarëve të kësaj partie por edhe partive tjera për korrupsion e përfshirje në veprimtari kriminale, ajo u kritikua nga një numër i kolegëve të saj nga mediet dhe shoqëria civile.
(M.D/Shuplaka)
Discussion about this post