Qytetarë dhe përfaqësues të shoqërisë civile kanë protestuar sot para Ministrisë së Drejtësisë në lidhje me vendimin e Gjykatës së Tropojës, për të hedhur poshtë vendimin e Gjykatës së Apelit për ndalimin e punimëve të HEC-eve në Valbonë. Kompania “Gener 2” nuk i ka ndalur punimet edhe pas vendimit të Apelit, por ka vazhduar ndërtimin e HEC-eve të Dragobisë dhe Ceremit.
Protestuesit kanë kërkuar nga ministrja e Drejtësisë Etilda Gjonaj të reagojë menjëherë për krimin që po bëhet në Valbonë.
“Skandali në Valbonë, skandal në gjithë Shqipërinë. Po neglizhoni në mënyrë skandaloze të drejtat e banorëve në Valbonë. Krimi që po bëni në Valbonë është një krim që penalizon një komunitet të tërë. Prandaj zonja ministre reagoni menjëherë. Vendosni ligjet e duhura për këtë tokë. Krimi në Valbonë, është krim ndaj natyrës”, janë shprehur përfaqësues të shoqërisë civile.
Ndërkaq ambientalisti i njohur, Sazan Guri ka kërkuar që punimet të ndalohen sot, sepse sipas tij nesër është shumë vonë dhe do të ketë dëme të pakthyeshme.
“E nderuar zonja ministre edhe ju zoti kryetar i gjykatës së Apelit, ne po ju kërkojmë që të ndaloni sot punimet në Valbonë sepse nesër është vonë. Ndaloni sot se nesër është vonë. Ne jemi këtu për t’ju kujtuar se jeni duke shkatërruar, po e ktheni vendin në një skëterrë. Janë 14 dëme të pakthyeshme që ju i bëni përmes këtyre dëmeve ogurzeza”,tha Sazan Guri.
Është për t’u theksuar se në protestë nuk ka vetëm shtetas shqiptarë, por edhe nga trojet shqiptare. Një qytetar nga Gjakova, është shprehur se Valbona nuk i përket askujt në veçanti por gjithë kombit. “Valbona nuk është e Gjakovës, as Tropojës por e gjithë kombit kombëtar. U mor vendimi për ndërprerjen e punimeve dhe ja ku jemi këtu, nuk ka demokraci”, u shpreh ai.
(J.D/Faxweb.al)
Discussion about this post