Vdekja e Andrea Stefanit ditën e djeshme ka hasur në reagime të shumta nga ana e miqve dhe kolegëve të tij. Dikush me simpati e ca të therë kanë shprehur edhe mllefin e tyre ndaj qëndrimeve dhe opinioneve të Andreas në të gjallë. Edi Oga, një nga gazetarët në vend, ka një kërkesë të thjeshtë për të gjithë, të respektohet i vdekuri. Eshtë e çuditshme sipas atij sesi disa njerëz në vend që të zgjedhin indiferencën në këto raste tregojnë fare mirë cinizmin e tyre.
Reagimi i plotë:
‘’Në vend të R.I.P
Kur del në TV dhe pozicionohesh politikisht, është e natyrshme që do marrësh vlerësime nga ata që e mendojnë si ti dhe kritika nga ata që e mendojnë ndryshe. Në përditshmërinë tonë, për këta personazhe, vlerësimet nga publiku janë minimale dhe kritikat kanë formën e ofendimeve.
Kjo më duket e sikletshme.
Vdektarë të gjithë, kur dikush ndërron jetë, përsa njeri publik, është e udhës të shprehësh ndjesitë e momentit, të rradhisësh kujtime me të ndjerin nëse ke pasur, të ngushëllosh të dashurit.
Kjo është në normën tonë sociale.
Shpesh e më shpesh, në rrjetet sociale, thuren elozhe për dikë që mbase nuk ka pasur aq ndikim në jetët e shumëkujt, mbivlerësohet dikush vetëm se mendimi dhe puna e tij kanë qenë të shpërfaqura në publik, derdhen RIP-lotë emoticon-esh për vëmendje.
Kjo më duket irrituese.
Por ka edhe komente të tipit ‘iku edhe një plehrë’, ‘shumë e vonoi’, ‘pastë këmbën e mbarë’…e më të egra akoma.
Kjo mua më duket e frikshme !
Të jetosh me idenë se pranë ke njerëz të tillë, të shkakton neveri dhe parehati. Tipa të tillë duhen mbajtur sa më larg nga jeta jote !
Ka edhe mënyra të tjera më “praktike” për të përcjellë persona që i keni urryer; ngazëllimi në vetvete apo në rreth të ngushtë, por kurrsesi në publik.
I vdekuri nuk ka nevojë për asgjë, të gjallët e tij, kanë. Nëse nuk ke asnjë motiv për ti shprehur simpati dikujt që largohet, atëherë ‘shprehu më njerëzisht’, me indiferencën tënde !’’
