Një foshnje 15 muajshe u paraqit pa shenja jete ditën e djeshme në urgjencën e Spitalit të Durrësit. Për shkaqe ende të paditura, të cilat po hetohen ende.
U bë me dije një ditë më parë, se foshnja kishte tri ditë që po mjekohej për virozë të stinës, çka bën që dyshimet të bien dhe mbi mjekët. Për rastin në fjalë, shefi i Pediatrisë së Durrësit, Fatmir Shanini, u shpreh për “DurrësLajm” se shkaqet e vdekjes së vogëlushes mund të jenë të ndryshme, ndërkohë që prindërit duhet t’i ishin drejtuar mjekut të familjes për çdo problem që mund t’i shfaqej.
“Vajza është paraqitur më 14 prill në orën 23:00 të mbrëmjes me probleme në rrugët e frymëmarrjes. I është bërë Aerosol për zhbllokimin e frymëmarjes nga sekrecionet, nuk ka qenë në gjendje të rëndë shëndetësore, ka qenë brenda parametrave. Shkaku i vdekjes mund të jetë: vdekje e papritur që ndodh tek fëmijët, apo një bllokim i aparatit respirator të frymëmarrjes, si rezultat i bllokimit nga sekrecionet. Prindërit duhet ta çonin fëmijën tek mjeku i famlijes për çdo problem që mund t’i shfaqej”,- është shprehur shefi i pediatrisë.
(XH.A/SHUPLAKA)
