Gjykata e Apelit ka anuluar aktvendimin e Gjykatës Themelore në Prishtinë- Dega në Lipjan, e cila më 9 korrik 2025 ua ka caktuar masën e paraburgimit të dyshuarve, rreshterit Ibrahim Nela dhe zyrtarëve policorë: Albian Retkoceri, Artidon Konxheli, Liridon Rrahmani dhe Endrit Beqiri, nën dyshimin për vrasje nga pakujdesia të qytetarit Agon Zejnullahu.
Me aprovimin e ankesave të mbrojtësve të të dyshuarve, Apeli e ktheu çështjen në rivendosje. Sipas vendimit të Apelit, ankesë ndaj vendimit të Themelores, e cila kishte caktuar paraburgimin kanë parashtruar mbrojtja e pesë policëve të dyshuar.
Apeli vlerëson se seanca dëgjimore është mbajtur në shkelje të dispozitave ligjore. Sipas Apelit, prokurori i shtetit nuk e ka elaboruar kërkesën për caktim të paraburgimit dhe se nuk ekziston konstatimi se palët kanë hequr dorë për elaborim të kërkesës për paraburgim.
Shkalla e dytë thekson se vendimi i Themelores nuk përmban analizë dhe vlerësim të provave relevante për të konstatuar dyshimin e bazuar mirë se të dyshuarit kanë kryer veprën penale për çka dyshohen.
Gjithnjë sipas vendimit të Apelit, shkalla e parë vetë ka listuar prova dhe se të njëjtat nuk janë vlerësuar apo analizuar për të kuptuar se a ekziston dyshimi i bazuar që të caktohet pastaj masa e paraburgimit, pasi që ekzistimi i dyshimit të bazuar llogaritet sipas vendimit, kusht për caktim të paraburgimit.
Po ashtu, në këtë vendim thuhet se në mungesë të analizimit të secilës provë veç e veç, i mungon individualizimi i veprimeve të secilit të dyshuar për të përcaktuar pastaj intensitetin e veprimeve të të dyshuarve.
Aty thuhet se po të përcaktohej veprimi individual nga gjyqtarja e procedurës paraprake për secilin të dyshuar, do të mund të caktohej masa e sigurisë në proporcion me veprimet e secilit të dyshuar.
Prandaj, sipas Apelit, shkalla e parë ka dështuar të bëjë analizën e dyshimit të bazuar duke rrëshqitur kështu në vlerësim formal dhe jo substancial të rrethanave për caktim të paraburgimit. Apeli ka sqaruar se shkalla e parë ka dështuar të arsyetojë rrezikun e përsëritjes së veprës penale.
Sipas kësaj Gjykate, ka qenë i kushtëzuar vendimi për kthim në rigjykim për shkak se lënda është bartur në Sistemin për Menaxhimin Informativë të Lëndëve dhe se nuk ka poseduar shkresat e lëndës fizikisht sidomos për të vlerësuar CD dhe video-incizimet.
Andaj, në rivendosje, Apeli thekson se shkalla e parë duhet të vlerësojë standardin e dyshimit të bazuar, të bëhet individualizimi i veprimeve të secilit të dyshuar, të specifikohen rrethanat konkrete që përbëjnë rrezik të përsëritjes së veprës penale dhe të vlerësohet CD.
