Me ardhjen në pushtet të Partisë Socialiste dhe aleatëve të saj, në vjeshtën e vitit 2013, nisën të ndërmerreshin disa reforma, që sipas qeverisë së re, do të rikthenin fuqinë e shtetit dhe të ligjit në vend. Bëhej fjalë për kontrollin ndaj territorit dhe mospagimin e energjisë elektrike.
Më 27 tetor 2014, kryeministri Edi Rama, gjatë konferencës “Takimi kombëtar, Mbrojtja e energjisë dhe lufta ndaj krimit urban dhe mjedisor, sfida të përgjegjësisë publike”, shprehej se, kushdo që vjedh energjinë elektrike nuk do të ndëshkohet me gjobë, por do të dënohet me tre vute burg, ndërsa për bashkëpunëtorët dënimi do të ishte 5 vjet burg.
“Vjedhja e energjisë duhet të ndëshkohet si çdo vjedhje tjetër. Ky veprim ka qenë i padënuar për 20 vite me rradhë. Sot lancohet një operacion i cili do të kthejë faqen në këtë sektor, duke kthyer energjinë në një pasuri që mund të vidhet lirisht në një burim mirëqënie dhe rritje eknonomike, shprehej kreu i qeverisë Edi Rama.
Menjëherë pas nisjes së aksionit qindra e mijëra debitorë ndaj OSHEE-së u arrestuan dhe përfunduan në burg, ngjarje këto që mbuluan kronikën e zezë për muaj me rradhë, por që sollën edhe reagimin e opozitës, e cila e quante gjithçka një show të qeverisë në kurriz të njerëzve nevojtarë.
Por bashkë me aksionin për energjinë elektrike nisi edhe ai për ndërtime pa leje. Sipas qeverisë, kushdo që ndërtonte pa leje rrezikonte deri në 8 vite burg, madje edhe ata që ndërhynin në banesat e tyre pa marrë më parë leje te organet kompetente.
“Ndërtimi apo punimi i kryer pa leje, në shkelje të lejes, ose në kushtet e një lejeje të shfuqizuar dhe në tokë të vet, dënohet me burgim deri në një vit. Po kjo vepër, e kryer për qëllime fitimi, në tokën publike, ose shtetërore apo në tokën e tjetrit, dënohet me burgim nga dy deri në tetë vjet”, thuhej në projektligjin e qeverisë.
Këto aksione rritën të ardhurat në arkat e OSHEE-së dhe ndaluan ndërtimet pa leje, por patën kosto jo pak të vogla sociale.
“Shuplaka” sjell më poshtë tre raste të rënda, ku 4 qytetarë kanë humbur jetën si rrjedhojë e këtyre aksioneve të qeverisë, përfshirë edhe arrestimet për sasi tepër të vogla të kanabisit, që në shumicën e rasteve janë për përdorim vetjak.
Më 28 dhjetor 2014, dy muaj pas nisjes së aksionit nga qeveria, 52-vjeçari Qamil Zela, nga Lushnja, u vetëvar në burgun e Rrogozhinës. Ai ishte arrestuar me akuzën e “vjedhjes së energjisë elektrike”,. ndërsa familjarët e tij pretendonin se i ndjeri i kishte OSHEE-së 35 mijë lekë të vjetra borxh.
Familjarë të të ndjerit Qamil Zela:
Në maj 2016, në zonën e Qerretit në Kavajë, dy fëmijë 3-5 vjeç humbën jetën në një aksident të rëndë rrugor, ndërsa u plagosën nëna 24-vjeçare dhe një foshnje 13 muajshe. Familja ishte duke shkuar në burgun e Rrogozhinës, aty ku vuante dënimin për “ndërtim pa leje” bashkëshorti dhe babai i viktimave.
Vendi ku ndodhi aksidenti:
Rasti më i fundit ndodhi vetëm një ditë më parë, ku po në burgun e Rrogozhinës u gjend i vetëvarur 22-vjeçari nga Lushnja Estref Halili. Ky i fundit ishte arrestuar më 26 dhjetor 2016 pasi në makinën e tij policia kishte gjetur 3 gram kanabis sativa dhe një thikë.
Viktima Estref Halili:
Ndryshe nga rasti fatkeq i Estref Halilit, i cili qëndronte në burgun e Rrogozhinës për vetëm 3 gram kanabis, rast analog është ai i reperit nga Kosova, Ylber Abdullah, i njohur si Cozman.
Reperi i njohur u kap të shtunën 2 Korrikut me 20 gramë marijuanë në makinë. Cozman udhëtonte me të dashurën e tij, këngëtaren nga Shkupi Altuna Sejdiu, dhe u kapën nga policia pranë stacionit të Trenit në Tiranë. Ata ishin të shoqëruar edhe nga dy persona të tjerë dhe ktheheshin nga një koncert i mbajtur tek ish-Piramida. Gjatë arrestimit ata ishin shprehur se lënda narkotike ishte për konsumim vetjak. Më 6 korrik ai doli para gjykatës, e cila e la të lirë kundrejt një garancie prej 5 mijë eurosh. (A.R/SHUPLAKA)
Cozman në Gjykatën e Tiranës:
