Kryetari i Bashkisë, Erion Veliaj gjatë takimit me përfaqësuesit e njësive administrative dhe me kryepleqtë e lagjeve ka deklaruar se që prej ditës së nesërme do të jenë në terren 70 koordinatorë për të zgjedhur administratorët e pallateve për ndarjen në burim të mbetjeve.
Zgjedhja e administratorëve të pallateve bëhet për shkak se ata do të luajnë rolin e ndërmjetësit dhe zgjidhësit për problemet që banorët e pallatit kanë me njeri-tjetrin.
“Nëse bëjmë gjëra dhe nuk i mirëmban askush, nëse një njeri mban peng një pallat të tërë se nuk paguan faturën për djegien e pompës, nuk jep kontribut për të mirëmbajtur ashensorin, s’ka vlerë.Ndaj, masa konkrete që marrim sot ka të bëjë me vendosjen e administratorëve të pallateve në 5 mijë pallatet e Tiranës, që njëherë e mirë në këtë qytet të ketë rregull, edhe pse jemi një milion banorë, dhe të respektojmë secilin sikur të ishim një familje e vogël”, tha ai.
Ai shpjegoi hapat që do të ndiqen në ditët në vijim, deri në zgjedhjen e administratorëve dhe fillimin e funksionimit të tyre. “Hapi i parë: do të krijojmë një asamble të banorëve të pallatit.
Asambleja e banorëve të pallatit përbëhet nga të gjithë qytetarët që banojnë në atë pallat.
“Hapi i dytë: organizojmë zgjedhjet e asamblesë. Stafi i bashkisë është t’ju koordinojë, t’ju njoftojë datën, vendin ku do takoheni për të bërë këto zgjedhje, dhe pastaj me një votim demokratik të vendosni 3-5 veta, sipas ligjit, që do të jenë kryesia e asamblesë. Hapi i tretë: kjo kryesi, me 3-5 veta, do të kontraktojë administratorin e pallatit”, u shpreh ai. Ai bëri të ditur se Bashkia e Tiranës do të bëjë edhe trajnimin e administratorëve, për t’iu shpjeguar atyre kompetencat dhe më pas administratori do të çertifikohet. Ai shprehu besimin se brenda vitit tjetër do jenë zgjedhur të gjithë administratorët e 5 mijë pallateve në Tiranë.
Veliaj tha se nga kjo fundjavë nis edhe projekti tjetër ambicioz i Bashkisë së Tiranës, ai për diferencimin e mbetjeve në burim.
“Do të fillojë punë ndërmarrja publike Eco Tirana, e cila ka nisur vendosjen e koshave të rinj nëpër rrugët e qytetit. Secili prej banorëve do të duhet që t’i ndajë në dy qese mbeturinat e veta, ato që mund të riciklohen për në koshin e gjelbër, dhe ato që nuk riciklohen për në koshin blu”, tha Veliaj.
