Njësisë nr. 8 në kryeqytet i është hequr statusi “Zonë Muzeale”. Heqja e këtij statusi ka qenë një prej premtimeve të mbajtura të Bashkisë së Tiranës. Gjatë një diskutimi, nënkryetari i bashkisë, Arbjan Mazniku u shpreh se me heqjen e këtij statusi, do të mundësohet zhvillimi i mëtejshëm i zonës.
Ai u shpreh se prej vitesh kjo zonë ka qenë jashtë vëmendjes së investimeve publike, duke bërë që shumë prej shtëpive të kësaj zone të mos kenë asgjë që i lidh me konceptin muzeal.
“Për fat të keq për shumë vite me radhë është lënë pas dore nga vëmendja e investimeve publike, por edhe nga mënyra si mund të zhvillohej kjo pjesë e Tiranës. Shumë nga këto shtëpite e vjetra nuk kanë asgjë që ti lidhi me konceptin muzeal.”, mësohet të ketë thënë Mazniku.
Të njëjtin qëndrim ka mbajtur edhe deputeti i Njësisë nr. 8, Ervin Bushati, i cili u shpreh se kjo zonë nuk ka asnjë element për të mbajtur statusin muze.
