Kryetari i Bashkisë së Tiranës, Erion Veliaj, ka parashtruar hapat që do të ndërmerren për të lehtësuar trafikun urban në kryeqytet. Ai është shprehur se të ngarkuarit nga Bashkia, do të punojnë për përballimin e fluksit të mëngjesit dhe orareve të pikut.
Në kuadër të këtyre ndryshimeve, do të mundësohet hapja e çerdheve dhe kopshteve në 06:30 të mëngjesit, do të punohet për pastrimin dhe kondicionimin e urbanëve.
“Do të fokusohemi akoma më shumë te pastrimi, te kondicionimi tani që ngrohet koha dhe sigurisht te fluksi i mëngjesit, që falë disa riorganizimeve që kemi bërë me oraret, si për shembull hapja e çerdheve dhe kopshteve në 6 e gjysmë, do të kemi mundësi që ta fazojmë në fasha të ndryshme transportin publik gjatë orëve të mëngjesit”, u shpreh Veliaj.
Këtë deklaratë ai e bëri gjatë inspektimit të linjës urbane Qendër-Tufinë, e cila është zgjatur me 3 stacione të tjera.
(XH.A/SHUPLAKA)
