Bashkia e Tiranës ka nisur investimin për ndriçimin e rrugës dhe urbanizimin e segmentit tek mbikalimi i Kamës. I pranishëm për inspektime në këtë zonë të Tiranës ishte edhe kryebashkiaku Erion Veliaj.
Ai shprehu entuziazmin për projektin e ri, hyrjen veriore të Tiranës. Ai bëri me dije se janë planifikuar edhe dy hyrje të tjera, hyrja nga Kamza dhe hyrja nga Kombinati. Ai bëri me dije se projekti synon veç ndriçimit dhe barrierave mbrojtëse të rrugës, edhe urbanizimin e zonës.
Kryetari i Bashkisë së Tiranës bëri të ditur se zona do të ketë 115 shtylla, 210 ndriçues, 3 km urbanizim me sinjalistikë, me kanale të ujërave të zeza, me infrastrukturën e nevojshme për këmbësorët.
Më tej, ai u shpreh se pavarësisht sulmeve politike ndaj bashkisë, përgjigja më e mirë ndaj tyre do të jetë pikërisht puna.
“Investimi do të kontribuojë që të kemi një zonë totalisht të urbanizuar, një zonë që është trajtuar si një zonë e dorës së dytë, edhe pse Lapraka është mbajtur si bastion i të djathtës ka pasur investimet më të ulta. Nuk është bastion i të majtës, por ka investimet më të mëdha. Do të thotë që kemi një frymë të re në Bashkinë e Tiranës, që nuk i ndajmë njerëzit në të nënës dhe të njerkës, por i përgjigjemi njerëzve për arsyen e vetme se janë kryeqytetas të Tiranës dhe duhen të trajtohen me dinjitetin e një kryeqyteti”, tha kryebashkiaku. (XH.A/SHUPLAKA)
Discussion about this post