Kryetari i Bashkisë së Tiranës, Erion Veliaj, ka vizituar sot mjediset e Shërbimit Zjarrfikës ku falenderoi punonjësit për profesionalizmin e treguar në përballimin e situatës në kryeqytet shkaktuar nga ulja e temperaturave. Ai i falenderoi ata që kanë qenë në tre turne gatishmërie dhe që kanë ndihmuar në parandalimin e situatave fatale në kryeqytet.
“Jam krenar që jam kryetar i një qyteti që funksionon me këtë filozofi, të gjithë për një, kur vjen puna tek rastet në nevojë. Zjarrfikësit kanë qenë heronjtë e qytetit tonë dhe jam këtu për t’u treguar se sa krenar jam si kryetar bashkie për të gjithë ata që kanë shërbyer me 3 turne në këto ditë gatishmërie. Fatmirësisht, falë shërbimit të heronjve tanë nuk kemi pasur asnjë fatalitet në Tiranë dhe do doja që të vazhdonim në këtë gjendje edhe dy tre ditët e ardhshme, teksa temperaturat ngrihen.”, është shprehur Veliaj.
Në vijim, kryebashkiaku i Tiranës shprehu falënderime edhe restorantet që kanë gatuar, dyqanet dhe kompanitë që janë ofruar me veshmbathje, për ata që janë ofruar me batanije, me tesha edhe ndërresa.
“E vlerësoj jashtë mase sepse treguam që pavarësisht se jemi bërë një qytet shumë i madh, e kemi ruajtur intimitetin që ka një familje për t’iu gjendur njëri-tjetrit në nevojë. Kjo është e dukshme edhe sot me kolegët e zjarrfikëses, falë dhjetëra qytetarëve që kanë telefonuar, për një fqinj, për një të moshuar, për një komshi, i cili ka qenë në gjendje jo shumë të mirë shëndetësore, nuk i është përgjigjur trokitjeve në derë ose telefonatave, janë shpëtuar dhjetëra jetë njerëzish”, u shpreh ai më tej. (XH.A/SHUPLAKA)
Discussion about this post