Gjatë mbledhjes së sotme të Këshillit Bashkiak, kryebashkiaku Erion Veliaj deklaroi se denoncimi ndaj në SPAK është bërë nga një person me emrin Nesti Angoni, i cili është i sajuar sepse nuk ekziston në regjistrat e gjendjes civile. Ai e cilësoi këtë si një përpjekje për të hedhur baltë përmes metodave të ulëta të kulturës linçuese dhe letrave anonime që bëheshin qëmoti.
“Jam denoncuar në mënyrë anonime nga një qytetar që quhet Nesti Angoni, i cili nuk ekziston, për të na kthyer mallin e letrave anonime. Unë e kuptoj se disa njerez, që nuk na mundin dot në betejë, që nuk na mundin dot në zgjedhje, janë kthyer në zanatin e letrave anonime. Personi Nesti Angoni nuk ekziston, por të gjithë e dimë kë përfaqëson ky emër, çfarë mentaliteti përfaqëson, çfarë kulture linçuese përfaqëson ky stil. Megjithatë, pavarësisht se kryetari i bashkisë ka në zotërim të gjithë regjistrin civil dhe mund të verifikojë qartazi se është një kurth i sajuar, kam qenë bashkëpunues”, u shpreh Veliaj.
Duke folur për bashkëpunimin e tij me organet e drejtësisë, ai theksoi se nuk ka asgjë për të fshehur dhe se gjithçka është e verifikueshme. “E di gjithë Tirana se ku jetoj unë, e di gjithë Tirana se ku banoj unë, ku isha para zgjedhjeve, ku vazhdoj pas zgjedhjeve, dhe ku do jem deri në fund të kësaj detyre. Unë hyj te ajo racë politikanësh që nuk i thotë SPAK-ut, “Skap” kur s’i intereson, dhe SPAK kur i intereson për kundërshtarët e vet”, tha kryebashkiaku.
Veliaj shtoi se pavarësisht letrave anonime apo kurtheve politike, ai do të vazhdojë angazhimin e tij me transparencë dhe besim në mbështetjen e qytetarëve të Tiranës. “Nuk kam organizuar antiprotesta, nuk kam bërë letra anonime, se vij nga një brez jo i letrave anonime dhe as nuk i them SPAK-ut “plaç”. Këtu do jemi, në maj do t’ju mundim me gjithë letrat anonime, me gjithë kurthet dhe me gjithë klithmat e hienave”, nënvizoi Veliaj.
