Shpesh në takimet elektorale që kreu i PS-së Edi Rama ka zhvilluar gjatë ditëve të fundit, është vënë re edhe prania e kryetarit të Bashkisë së Tiranës, Erion Veliaj. Kryesisht në zona brenda apo afër kryeqytetit, por jo vetëm.
Në këto takime, Erion Veliaj ka përsëritur nevojën për të zgjedhur PS-në më 25 qershor, nëse duam të shohim të tjera ndryshime përmirësuese në Tiranë, por ai nuk është mjaftuar me kaq.
Kryebashkiaku i Tiranës ka realizuar edhe një spot publicitar me anë të së cilit kërkon që të votohet për Edi Ramë, “Shqipërinë që duam”. Ai shprehet ndër të tjera në spot se e njeh shumë mirë Edi Ramën dhe vetëm falë këtij të fundit Tirana është zgjuar, ndryshe nga koha kur Basha mori drejtimin e kryeqytetit.
“Kur Lulzim Basha mori drejtimin e Bashkisë së Tiranës, i gjithë qyteti ra në gjumë, bashkë me Lulin. Nëse nuk arrin dot të bësh punën e kryetarit të Bashkisë së Tiranës nuk mund ta drejtosh dot Shqipërinë.
Ndërkohë në dy vitet e fundit, falë mbështetjes dhe vizionit të Edi Ramës, Tirana është zgjuar. Po rikonstruktohen shkolla, kopshte, çerdhe, kënde lojërash. Qyteti sot është më i pastër, ofron më shumë vende pune. Ndërkohë që Rilindja urbane ka prekur çdo cep të Tiranës, duke filluar nga këtu, sheshi “Skënderbej” deri tek Pazari i Ri, apo nga Parku Olimpik deri në zgjatimin e Bulevardit.
Unë e njoh shumë mirë Edi Ramën dhe jam i bindur se me mbështetjen e qeverisë së tij, ajo që po bëhet këtu në Tiranë, do të bëhet në gjithë Shqipërinë. Nuk ka fare rëndësi nëse je demokrat apo socialist, por në datën 25 qershor voto Edi Ramën për Shqipërinë që duam.”, shprehet Veliaj në spotin publicitar.
(XH.A/SHUPLAKA)
Discussion about this post