Kryetari i Bashkisë së Tiranës, Erion Veliaj, përsëriti së fundmi nevojën që qytetarët e Tiranës të votojnë Edi Ramën më 25 qershor, për të parë sërish investime të reja sikundër këto që janë kryer deri më tani.
Ai u shpreh se duhet një votë e fuqishme për Edi Ramën, ndaj mezi pret që të shohë se ç’notë do i vendoset Bashkisë së Tiranës më 25 qershor për të gjitha investimet:
“Nëse qytetarët duan që puna të vazhdojë, nëse duan që të shtojmë ritmin, nëse duan që të punojmë me të njëjtën cilësi, nëse duan që investimet të prekin gjithë Tiranën, na duhet një votë e fuqishme për Edi Ramën, për t’u siguruar që bashkia t’i ketë krahët e ngrohta dhe dyert e hapura për të vijuar ritmin e investimeve edhe në dy vitet e tjera. Mezi pres që qytetarët t’i japin një notë Bashkisë së Tiranës në datën 25 qershor për të gjitha këto investime dhe të vazhdojmë përpara për qytetin që duam, edhe për Shqipërinë që duam”, nënvizoi Veliaj.
Ai bëri gjithashtu me dije se në orën 20:00 të 20 qershorit do të hapet segmenti i parë i Bulevardit të Ri, ndaj fton të gjithë qytetarët që të jenë aty për të qenë present në hapjen e ngjashme me atë të sheshit “Skënderbej”:
“Ftoj të gjithë qytetarët që në datën 20 qershor, ora 20:00, të jemi te Bulevardi i Ri për të bërë një hapje, njësoj siç festuam për Sheshin “Skënderbej”. Ky ka qenë një vit fantastik për Tiranën dhe besoj se qytetarët me atë që kanë parë te sheshi “Skënderbej”, Parku Olimpik, lodrat e Liqenit, Unaza e Vogël, e të gjitha investimet e tjera, si Pazari i Ri, janë të mendimit se ky ka qenë një vit i shkëlqyer për qytetin. I kemi të gjitha mundësitë që të vazhdojmë kështu edhe në dy vitet e ardhshme.”
(XH.A/SHUPLAKA)
Discussion about this post