Kryetari i Bashkisë së Tiranës, Erion Veliaj, ka folur gjerësisht për arritjet, projektet dhe objektivat e Bashkisë së Tiranës, në emisionin “Koha për t’u zgjuar” .
Ai u ndal gjatë tek parkimi nëntokësor në qendër të kryeqytetit, për të cilin u shpreh se do të sjellë të ardhura për qytetarët dhe paratë që do të fitohen do të përdoren për investime. Veliaj shpjegoi se problemi i parkimit do të zgjidhet duke proceduar me mesazh me drejtuesit e mjeteve.
“Punimet në qendër të qytetit të Tiranës po shkojnë shumë mirë. Kontestimet na bëjnë të punojmë më shumë. Do të zgjidhet problemi i parkimit, i cili nuk ka vetëm të mirën që sjell të ardhura për qytetin. Parkimi nëntokësor ka përfunduar dhe paratë që do të fitohen nga parkingjet do të kthehen në investime për qytetarët. Do të procedohet me mesazh me drejtuesit e mjeteve. Pasi të ketë kaluar afati i parë për parkimin e mjetit, ata do të pyeten me mesazh nëse do të vazhdojnë të mbajnë mjetin të parkuar aty.”, është shprehur ndër të tjera Veliaj.
I pyetur për menaxhimin e situatës të të ftohtit në Tiranë gjatë periudhës kur vendi u karakterizua nga temperatura mjaft të ulëta, jo tipike për vendin tonë, kryetari i Bashkisë së Tiranës u shpreh se situata u menaxhua me sukses.
“E menaxhuam me sukses situatën e të ftohtit duke ndërhyrë qoftë edhe me forcë. Kjo për shkak se endacakët e dehur nuk ishin të ndërgjegjshëm për situatën e tyre. Kemi shpërthyer edhe dyert e banesave të të moshuarve të vetmuar që kishin humbur kontaktet me të afërmit e tyre.”, ka treguar më tej ai. (XH.A/SHUPLAKA)
Discussion about this post