Emisioni “Presa Diretta” në televizionin italian “RAI3” i ka kushtuar një artikull të veçantë Shqipërisë, kryesisht shqiptarëve të Italisë dhe ndryshimeve rrënjësore që po ndodhin në Tiranë.
Pasi flet për shqiptarët e Italisë, komunitetin më të madh prej më shumë se 500 mijë shqiptarë që jetojnë në Itali dhe niveli i lartë të integrimit të tyre.
Reportazhi bën një panoramë të gjerë mbi shembuj shqiptarësh të suksesshëm në Itali dhe më pas i kthehet ndryshimeve rrënjësore që vendi ka pësuar, e kryesisht Tirana. Kryeqyteti shqiptar cilësohet si shembull i një kryeqyteti të ri, dinamik dhe modern.
Gjatë reportazhit është intervistuar edhe kryebashkiaku Erion Veliaj, që ndër të tjera është shprehur se brenda një kohe të shkurtër Tirana do të kthehet në një nga qendrat më të rëndësishme të Ballkanit.
Intervista e plotë
Veliaj: Jemi duke punuar me një ekip Italian, Stefano Boeri dhe disa arkitektë të tjerë, për të hartuar planin urbanistik të Tiranës së re.
Gazetarja: Bëhet fjalë për një investim prej sa milionë eurosh?
Veliaj: Në total, gjysmë miliardë.
Gazetarja: Erion Veliaj është kreu i ri i Bashkisë së Tiranës. Më parë, ish-ministër i Punës e tashmë një politikan shumë i njohur këtu në Shqipëri. Shprehet se çdo vit rritet numri i italianëve që kërkojnë të punojnë apo jetojnë në Tiranë.
Veliaj: Vitin e kaluar firmosa 20 mijë leje-qëndrimi, ndaj mendoj se është një vend i mirë për biznes. Shumica janë të rinj, kanë shumë energji dhe talent, flasin katër apo pesë gjuhë të huaja. Mosha mesatare është 30-31 vjeç, pra shumë të rinj. Rrjedhimisht nuk u mungojnë idetë për start-up dhe këtë muaj kemi pasur më shumë interes nga Italia për kompani që merren me açounting, financa publike se sa për call center.
Gazetarja: Cili është parashikimi juaj për Tiranën pas 5 apo 10 viteve?
Veliaj: Këtë vit, “The Guardian” e cilësoi Tiranën në dhjetëshen e parë sa i përket listës së vendeve për të bërë turizëm. Ndaj, besoj se pas 5 vitesh do të jetë epiqendra e Ballkanit.
Gazetarja: Sa ndikon, sipas jush, kjo marrëdhënie e privilegjuar me Italinë në gjithë atë çka thatë?
Veliaj: Besoj se për shumicën e shqiptarëve, Shqipëria është si një qytezë e Italisë, ku shumica dërrmuese flet italisht, është në kontakt me televizionin italian, ndaj ndihet edhe pjesë e familjes, në një farë mënyre. Po ashtu, edhe italianët që vijnë këtu ndihen si në shtëpinë e tyre. Kjo në fakt është diçka që nuk e vlerësojmë sa duhet. Tani, kjo vala e populizmit, ku të gjithë hartojnë platforma politike kundër emigrantëve, myslimanëve apo të huajve, kjo nuk është diçka e mirë. Italia dhe Shqipëria kanë pasur gjithmonë lidhje të ngushta, duke konsoliduar një platformë për një bashkëjetesë në harmoni, duke zhvilluar biznesin dhe raportet e mrekullueshme njerëzore.
