Ditën e sotme, kryebashkiaku i Tiranës, Erion Veliaj, ka inspektuar ndërhyrjet që po bëhen për rikualifikimin urban të bllokut nr. 1 në Laprakë, që kufizohet nga rrugët “Don Bosko” – Shinat e Trenit (Filanto) – Rr. “Turhan Pashë Përmeti” – “Ibrahim Pashë Bushatlliu” – “Lord Bajron” – “Riza Cuka” – “Learton Vathi” – “Pandi Dardha” – “Dritan Hoxha”.
Gjatë inspektimit, ai falenderoi banorët e zonës për bashkëpunimin dhe kërkoi sërish ndihmën e tyre në aksionin kundër ndërtimeve pa leje që duhen prishur.
Ai u bëri thirrje qytetarëve që të ndihmojnë duke diferencuar mbetjet që në burim, me qëllim mbajtjen pastër të qytetit: “Dua t’u kërkoj qytetarëve bashkëpunim edhe për projektin tonë të diferencimit të mbetjeve në burim. Është e rëndësishme që të gjithë banorët, të jenë të përgjegjshëm si fëmijët. Mbetjet e riciklueshme t’i hedhim në koshin e gjelbër (plastikë, karton, qelq), ndërsa produktet që nuk riciklohen, në koshin blu. Kështu, mund të kemi jo vetëm infrastrukturë të mirë, por edhe një lagje më të pastër”, u shpreh Veliaj.
Discussion about this post