Kryetari i Bashkisë së Tiranës, Erion Veliaj, ka qenë së fundmi i pranishëm në Krrabë, në kuadër të festivalit “Ritet Pranverore”, ku në shoqërinë e kryetarit të Këshillit Bashkiak dhe të Qarkut të Tiranës, Aldrin Dalipi dhe deputetit të PS-së, Xhemal Qefalia, vizitoi punimet artizanale të mjeshtrave të zonës dhe prodhimet bujqësore të Krrabës.
“Ju falenderoj që këmbëngulët që rruga të kthehej në një prioritet kryesor për bashkinë, e cila u siguruar që në vitin tonë të parë të kemi një lidhje me Krrabën. Kanë mbetur vendosja e sinjalistikës, vijëzimet, për ta mbajtur 100% premtimin që kemi dhënë për një rrugë me standarde.
Vetëm kur drejtojnë më të mirët, atëherë ecën përpara edhe Krraba, edhe Tirana, edhe Shqipëria. Do të vij sërish këtu deri sa të kem mbajtur fjalën. Nuk ka rëndësi nëse më keni votuar ose jo, por është e rëndësishme ta shohim njëri-tjetrin në sy dhe fjalën duhet ta mbajmë”, tha Veliaj.
“Mendoja se Pazari i Ri do të ishte një mision i pamundur. Megjithatë, punuan qindra vetë, gjetën gjuhën, bashkëpunuan, i dhanë dorën njëri-tjetrin, për atë xhevahir të bukur. Për pak do të hapim Bulevardin e Ri të Tiranës, një zonë tjetër që zhvillohet dhe zgjat qytetin drejt veriut, shumë afër Kamzës dhe Rinasit. Është shumë e rëndësishme që të kuptojmë se po të jemi bashkë nuk na thyen asgjë dhe mund të bëjmë gjëra të mrekullueshme. Gjërat dalin më bukur kur bashkëpunojmë”, vijoi më tej ai.
(XH.A/SHUPLAKA)
Discussion about this post