Ditën e sotme është zhvilluar në Gjykatën Administrative gjyqi mes Shoqërisë Civile dhe përfaqësuesve të shtetit për projektin “Veliera”, aq të diskutuar dhe kundërshtuar në qytetin e Durrësit.
Seanca e parë konsistonte në pajtimin mes palëve, por as përfaqësuesit e Shoqërisë Civile dhe as përfaqësuesit e shtetit nuk kanë pranuar të lëshojnë pe. “14 palë, përfaqësues të institucioneve të ndryshme kanë qenë pjesëmarrës në seancën gjyqësore, ku padia është bërë nga shoqëria civile për të konsideruar të paligjshëm projektin “Veliera”., bën me dije “DurrësLajm”.
Konkretisht, në seancën që u zhvillua pa praninë e mediave, kanë qenë të pranishme Bashkia Durrës, përfaqësues të Ministrisë së Turizmit, përfaqësues të disa prej institucioneve që kanë në varësi objekte arkeologjike, Drejtoria Rajonale e Mjedisit dhe kompanitë ndërtuese të projektit.
Juristja e ministrisë së Kulturës mësohet se kërkoi rrëzimin e padisë së ngritur, duke e cilësuar të paligjshme, kërkesë që u kundërshtua fort nga përfaqësuesja e Shoqërisë Civile, avokatja Mirela Jorgo.
Ndërkaq, mediat lokale raportojnë se punimet po vazhdojnë të ecin me ritme të shpejta, firma ndërtuese po vijon me ngritjen e një strukture prej disa metrash mbi sipërfaqen e pikës më të ulët, ndërsa arkeologët janë larguar pas testimeve të ndryshme që bënë.
(XH.A/SHUPLAKA)
