Policia e Velipojës ka finalizuar me sukses operacionin policor të koduar “Recently”, duke arrestuar në flagrancë dy të rinj të dyshuar për vjedhje të ndodhura në zonën turistike të Pulaj Plazhit dhe Rrjollit.
Të arrestuarit janë shtetasit A. P., 25 vjeç, me precedent penal për vjedhje, dhe F. U., 18 vjeç, të dy banues në Laç, bashkia Vau i Dejës.
Sipas njoftimit zyrtar, më datë 14 maj 2025, në fshatin Pulaj Plazh, të dy të rinjtë kanë vjedhur një çantë me një shumë të konsiderueshme parash në valuta të ndryshme nga automjeti i shtetasit K. N. Falë veprimeve të shpejta hetimore, autorët janë identifikuar dhe ndaluar vetëm disa orë pas ngjarjes.
Gjatë kontrollit në banesën e 25-vjeçarit A. P., shërbimet e Policisë sekuestruan një pjesë të shumës së vjedhur. Nga hetimet rezulton gjithashtu se A. P., më datë 11 maj 2025, ka tentuar të vjedhë në një tjetër automjet në fshatin Rrjoll, duke i thyer xhamin.
Operacioni “Recently” është pjesë e një plani të zgjeruar veprimesh për parandalimin e krimeve ndaj pronës në zonat bregdetare dhe turistike, veçanërisht me afrimin e sezonit veror.
Policia njofton se në bashkëpunim me Prokurorinë, vijojnë hetimet për dokumentimin e rasteve të tjera të vjedhjeve të mundshme të kryera nga dy të arrestuarit.
Materialet procedurale i janë referuar Prokurorisë së Rrethit Gjyqësor Shkodër, për veprat penale “Vjedhja”, kryer në bashkëpunim dhe “Shkatërrimi i pronës”.
