Një ditë pasi Lulzim Basha paralajmëroi djegien e mandateve të deputetëve të tij, kryeministri Edi Rama ka bërë lëvizjet e para, këtë herë jo përmes rrjeteve sociale.
Burime nga selia rozë bëjnë me dije se Rama në orën 9 të mëngjesit të sotëm do të ketë një takim me kreun e Kuvendit Gramoz Ruçi, dhe më pas do të mbledhë ministrat dhe deputetët. Nuk dihet ende se cili do të jetë qëndrimi i socialistëve, por ka zëra se vendi mund të çohet drejt zgjedhjeve të parakohshme parlamentare.
Rama nuk ka bërë asnjë reagim nga dje lidhur me vendimin radikal të Bashës, i cili nga ana tjetër ka mbledhur sot po ashtu grupin e deputetëve të tij, ku pritet të diskutohet djegia e mandateve.
Kreu i qeverisë Edi Rama gjatë ditës së djeshme ka qenë në Kosovë, ku gjatë fotove të rastit është parë tejet i shqetësuar me telefonata të vazhdueshme.
Derimë tani LSI nuk ka mbajtur një qëndrim të qartë nëse do ti bashkohet djegies së mandateve, megjithatë Kryemadhi ka përkrahur vendimin e marrë nga Basha.
Pas protestës së ditës së shtunë, PD dhe LSI do të organizojnë ditën e enjte një tjetër protestë, këtë herë përpara Kuvendit, ndërsa deri atë ditë pritet që të ketë një sërë lëvizjesh në skenën politike.
(E.K/FAXWEB.AL)
