“Fatkeqësisht asgjë e paparashikuar! Vijon revolucioni imagjinar me punonjësit e bashkive blu. I pyes: A ia vlen të kryeni krime zgjedhore e të përballeni me ligjin për ata që e katandisën PD LSI në këtë derexhe dhe duan ta bëjnë hallin e tyre me drejtësinë hall të Shqipërisë? Zero!”, ky është postimi i kryeministrit Edi Rama pak minuta më parë në Twitter, ku i referohet tensioneve që po ndodhin sot në të gjitha bashkitë e vendit, të drejtuara nga demokratët.
Në një reagim të mëparshëm Rama njoftoi ndryshimin e Kodit Penal, ku të gjithë personat që kryejnë krime elektorale, sipas ndryshimeve rrezikojnë deri në 10 vite burg. Nga ana tjetër qeveria bëri dhe lëvizjen e radhës, ku përmes ministrit Sandër Lleshaj, njoftoi se do të shkrihen një pjesë e strukturave të policisë bashkiake.
“Shfaqje brutale e dëshpërtimit politik të kthyer në akte kriminale që do të ndëshkohen me gjithë forcën e ligjit. Policia e Shtetit po provokohet dhe sulmohet, do të përgjigjet me vendosmëri deri në fund.
Punonjës bashkish, dhe punonjës të policive bashkaike po gabojnë rëndë duke u përdorur si mish për tob nga kryetarët e bashkive dhe udhëheqësit e tyre dritëshkurtër në Tiranë.
I bëj thirrje të mos bëjnë krime elektorale të dënueshme nga Kodi Penal, për interesat e një grupi njerëzish në halle me drejtësinë që duan të marrin peng zgjedhjet për të bllokaur rrugën integruese.
Do të shkrihen disa struktura të policive bashkiake që kanë dalë jashtë misionit të tyre dhe janë kthyer në rrezik publik. Askush nuk do të tolerohet. E gjithë kjo shfaqje nuk do të cënojë aspak rendin dhe sigurinë e qytetarëve. Policia e Shtetit është në krye të detyrës”, tha ministri Lleshaj.
(E.K/Faxweb.al)
