Ish-deputeti demokrat Luçiano Boçi në një intervistë për Faxweb ka komentuar vendimin e presidentit Meta për të shtyrë datën e mbajtjes së zgjedhjeve lokale. Boçi u shpreh se Meta është një njohës i mirë i Kushtetutës, dhe do të dijë që të argumentojë vendimin e tij.
Gjatë intervistës për gazetarin Fatjon Gjinaj, Boçi u shpreh se për të vendosur një datë të re për zgjedhjet, presidenti do të duhet që të ulë në tryezë të gjitha partitë politike, gjë që nuk do të pranohet nga PD sa kohë që Rama të jetë kryeministër.
Boçi e quajti këtë vetëm një moment të aksionit të opozitës, dhe se kauza e tyre për qeverinë tranzitore dhe për zgjedhjet e parakohshme do të vijojë.
Vendimi i Metës u prit me eufori nga radhët e qytetarëve përpara kryeministrisë.
Opozita e bashkuar sot mban protestën e 8-ë kombëtare, ndërsa prej 16 shkurtit ka nisur një sagë protestash para Kryeministrisë, Parlamentit dhe institucioneve më të rëndësishme në vend.
Deputetët e PD-së dhe LSI-së vendosën të digjnin mandatet e tyre në shkurt të këtij viti pas zbulimit të disa hetimeve të prokurorisë së Krimeve të Rënda se zyrtarë të lartë kanë ndërhyrë nëpërmjet shitblerjes së votës në zgjedhjet e shkuara parlamentare.
Kjo kauzë e opozitës u përforcua dhe pas artikullit të tabloidit gjerman BILD ku u publikuan 6 përgjime të bisedave të zyrtarëve të lartë të PS-së në Durrës me eksponentë të rrezikshëm të krimit, jo vetëm në vend.
Lideri i PD-së, Lulzim Basha në protestën e së dielës së shkuar paralajmëroi se nuk do të kishte më fjalë dhe se në protestën e ardhshme fjala do ti lihej sovranit.
Discussion about this post