Vendimi për kreun e AAK-së Ramush Haradinaj, i cili që prej katër janarit mbajhet në Francë për shkak të disa fletë-arresteve serbe, mund të shtyhet përsëri.
Ka qenë Gjykata e Colmarit në Francë, e cila ka thënë për Tanjug se vendimi përfundimtar mund të mos merret as këtë të enjte, siç ishte vendosur në seancën e kaluar të 2 marsit.
Në seancën e 6 prillit, në gjykatën e Colmarit do të diskutohen provat që Ministria e Drejtësisë ka paraqitur për rastin e Haradinajt.
Ramush Haradinaj u ndalua më 4 janar nga autoritetet franceze, në bazë të një urdhër-arresti serb të lëshuar 13 vjet më parë. Më 12 janar, Gjykata e Apelit në Kolmar e liroi me kusht që të qëndrojë në Francë, në pritje të shqyrtimit të kërkesës serbe për ekstradim. Ndalimi i tij nxiti reagime të ashpra në Kosovë, ku u mbajtën edhe protesta me kërkesën për lirimin e tij.
Ky është rasti i dytë që Haradinaj ndalohet në bazë të një urdhër-arresti serb. Në qershor të vitit 2015 ai u ndalua në aeroportin e Lubjanës, në Slloveni, ndërsa po kthehej nga një vizitë zyrtare në Berlin. Autoritetet në Kosovë kanë kërkuar disa herë nga policia ndërkombëtare, Interpol, që mos të merren parasysh urdhër-arrestet e lëshuara nga autoritetet e Serbisë për qytetarët e Kosovës. (D.D/Shuplaka)
