Autoritetet e Venezuelës kanë urdhëruar ndalimin e kanalit informative CNN në gjuhën spanjolle në vend, duke e akuzuar për përhapje të propagandës. Shkak është bërë një raport i publikuar nga kjo medie që shënjestron zyrtarë të qeverisë, të cilët akuzohen për mashtrime me pasaportat dhe vizat e lëshuara.
Komisioni Kombëtar i Telekomunikacionit në Venezuelë urdhëroi pezullimin e menjëhershëm të këtij kanali televiziv, duke e akuzuar se po përpiqet të minojë paqen dhe stabilitetin demokratik.
Ky investigim i CNN-it është një produkt i një hetimi 1-vjeçar që akuzon ndër të tjerë zv/presidentin Tareck El Aissami për pasaportat venezueliane që po u shiten njerëzve në Irak duke përfshirë edhe disa të lidhur me terrorizmin. Përfshirë këtu edhe grupin Hezbollah që nga Perëndimi dhe SHBA cilësohet si grup terrorist.
Këto zhvillime vijnë pak ditë pasi autoritetet amerikane vendosën sanksione kundër zv/presidentit të Venezuelës që e akuzuan për përfshirje në trafikun e drogës.
Vetë Presidenti i Venezuelës, Nicolas Maduro, reagoi për sanksionet e vendosura nga SHBA-të ndaj zëvendëspresidentit duke deklaruar se do të përgjigjeshin me forcë këtyre ndalimeve. (XH.A/SHUPLAKA)
(Zv/presidenti Tareck El Aissami & Presidenti Nicolas Maduro)
