Fillimisht u deklarua se biznesmeni Tefik Hyka kishte ndërruar jetë si pasojë e plumbave të marrë në kokë dhe afërsi të zemrës. Por mjeku që ka qenë në vendngjarje bëri të ditur se Tefik Hyka i kishte shpëtuar atentatit dhe ishte i ndërgjegjshëm, ndonëse në gjendje të rëndë shëndetësore.
Në informacionin që burime të policisë kanë shpërndarë pak më parë jepet informacion mbi mënyrën e ekzekutimit, ku ndodhej biznesmeni Tefik Hyka. Mësohet se janë sekuestruar pamjet filmike përreth vendngjarjes dhe janë shoqëruar disa dëshmitarë okularë.
Detaje të policisë:
Më datë 28.06.2017, rreth orës 10:25, tek numri i emergjencave 112, ka ardhur një telefonatë për të shtëna me armë zjarri, në rrugën “Gjin Bue Shpata”. Menjëherë janë nisur shërbimet e Policisë të cilët kanë konstatuar se në verandën e një lokali, është qëlluar me armë zjarri shtetasi T. H., rreth 56 vjeç, i cili ndodhet në spital nën kujdesin e mjekëve.
Nga hetimet paraprake dyshohet se kanë qenë dy autorë, të cilët janë larguar me një motor. Janë ngritur pika kontrolli dhe po kontrollohet zona përreth, parkinge automjetesh, garazhe etj , ku dyshohet se mund të jetë parkuar motori me të cilin kanë lëvizur autorët.
Gjithashtu janë sekuestruar pamjet filmike përreth vendit të ngjarjes dhe do sekuestrohen edhe pamjet filmike në të gjitha rrugët e mundshme ku mund të kenë lëvizur autorët. Janë shoqëruar disa dëshmitarë okularë në vendngjarje. Grupi hetimor po vijon punën për zbardhjen e plotë të rrethanave të ngjarjes si dhe për sigurimin dhe sekuestrimin e çdo prove që do shërbejnë për identifikimin e autorëve.
(XH.A/SHUPLAKA)
Discussion about this post