Kryetari i Kuvendit të Kosovës, Kadri Veseli ka folur për zgjedhje të parakohshme, për krizën politike dhe zgjedhjet në Drenas.
Sipas tij, vendi do të shkojë në zgjedhje vetëm përmes një marrëveshjeje politike.
“Qoftë deklarata ime e parë, qoftë edhe deklaratat pasuese, deri tek kjo deklaratë që do e jap, PDK si partia më e madhe në vend është e gatshme në çdo moment të shkojë në zgjedhje. Por ajo që është kryesore, ne asnjëherë nuk do të pranojmë të shkojmë në zgjedhje përmes krizave dhe konfliktit politik. Por dëshiroj të potencoj si kryetar i partisë më të madhe në vend, asnjëherë nuk do të shkojmë në zgjedhje për çështje të egos, çështje të ndërrimit të karrigeve ose luftës për pushtet. Do të shkojmë në zgjedhje të parakohshme vetëm përmes marrëveshjes politike, për të cilën duhet të kemi konsensus me parterët e koalicionit dhe opozitën”, ka thënë Veseli për RTK.
Veseli ka deklaruar se nuk ndihet krenar me zhvillimet që kanë ndodhur në Kuvendin e Kosovës, ndërkaq ka dënuar ashpër gjuhën që parti të caktuara politike kanë përduror për kundërshtarët e tyre politik. (A.R/SHUPLAKA)
