Vetëm në dy vitet e fundit janë kryer katër grabitje spektakolare. Por të katërta grabitjet ende nuk kanë përfunduar hetimet rreth tyre dhe nuk janë identifikuar autorët. Në pamje të parë ato duken vjedhje si nëpër filma por edhe shuma e parave të cilat janë grabitur nuk është e paktë. Nga një llogaritje e thjeshtë, nga ajo ç’ka është raportuar nga mediat rreth 9.5 milionë euro kanë shkuar për xhepat e grabitësve në këto dy viitet e fundit.
Vjedhjet sipas kronologjisë kohore:
- Në 3 shkurt të vitit 2015: Tre persona të maskuar e nën kërcenimin e armëve, duke qëlluar në ajër, kanë çarmatosur dhe kanë vjedhur bankën “Union Bank” te “Stacioni i Trenit” në Kryeqytet, duke marrë shumën prej afro 3 milionë euro, e cila ishte vendosur në 4 thasë. Autorët menjëherë janë larguar me mjetin tip “Land Rover” nga vendngjarja. Kjo grabitje ka ndodhur mesditën e 3 shkurtit.
- Në 3 dhjetor të vitit 2015-ës: 3.5 milionë euro u grabitën në 3 dhjetor të vitit 2015 nga autoblindi i “Rogat Security” i cili po transportonte para drejt Rinasit. Pas grabitjes e cila ka zgjatur 3 minuta në kryqëzimin e Laknasit në rrugën Tiranë-Rinas, autorët janë larguar me 4 thasë me para, ndërsa kanë qëlluar me armë në ajër për të trembur rojet e “Rogat Security”. Paratë ishin të një banke të nivelit të dytë dhe po transferoheshin për jashtë vendit.
- Më 30 qershor të vitit 2016: Tre persona të armatosur dhe të maskuar hynë në terminalin e aeroportit ndërkombëtar “Nënë Tereza” në Tiranë, dhe kryen grabitjen e 1 milionë eurosh. Grabitësit janë larguar dhe më pas mjeti i tyre është gjetur në flakë. Ngjarja ndodhi pikërisht kur ishte njoftuar rritja e shkallës së gadishmërisë në aeroport, pas ngjarjeve terroriste në Aeroportin “Ataturk” të Stambollit.
- Vetëm 4 orë më parë u bë grabitja spektakolare në Qafën e Kashar në afërsi të Rinasit dhe ku u vodhën më shumë se 2 milionë euro. Autorët kanë thyer me mjete të forta xhamat e makinave që po trasportonin paratë dhe njëkohësisht kanë qëlluar me armë zjarri kundrejt tyre. Këto para do të dërgoheshin drejt Vjenës dhe ishin tërhequr nga Banka e Shqipërisë, për llogari të një bankë të nivelit të dytë, BKT-së. (J.V/Shuplaka)
