Dyfishimi i tarifave të importit për çelikun dhe aluminin, i njoftuar nga Presidenti i SHBA-së, Donald Trump, ka hyrë në fuqi. Që nga mesnata e së martës një normë prej 50 përqind ka qenë në fuqi për importet në SHBA, nga 25 përqind që ishte më parë.
Trump thotë se dëshiron të korrigjojë çekuilibrat tregtarë dhe të forcojë industrinë vendase. Sipas njoftimeve të mediave ndërkombëtare, nga kjo taksë e importevë të çelikut dhe aluminit përjashtohet Britania e Madhe, për të cilat, sipas Shtëpisë së Bardhë, do të vazhdojë të zbatohet një normë prej 25 përqind. Kjo për shkak të një pakti tregtar që SHBA-të kanë lidhur me Mbretërinë e Bashkuar.
Trump e vulosi këtë veprim me një urdhër ekzekutiv që nënshkroi të martën. Rritja e tarifave ka të ngjarë t’i bëjë importet më të vështira dhe të çojë në çmime më të larta. Ekonomistët presin efekte të dukshme për konsumatorët – për shembull, kur blejnë makina, pajisje kuzhine ose mallra të konservuara.
Që nga viti 2024, Shtetet e Bashkuara ishin importuesi më i madh i çelikut në botë pas BE-së. Sipas qeverisë amerikane, vendet më të rëndësishme të origjinës janë Kanadaja, Brazili dhe Meksika.
Mbetet e paqartë se si do të reagojë BE-ja. Komisioni i BE-së e kritikoi ashpër njoftimin e Trump gjatë fundjavës dhe kërcënoi me një përgjigje para verës. Ky veprim shihet si një fyerje, veçanërisht duke pasur parasysh negociatat e intensifikuara së fundmi për të zgjidhur mosmarrëveshjen tregtare.
Megjithatë, sipas informacioneve të fundit nga Komisioni i BE-së, bisedimet vazhduan në fillim të javës dhe u përshkruan si “shumë konstruktive”.
Nëse Trump vazhdon me tarifat e dyfishuara, BE-ja mund të vendosë kundër-tarifa në afat të shkurtër.
