Kreu i qeverisë Edi Rama, duket se ka gjetur refrenin e këtij fillmshkurti, dhe që do të jetë pikërisht antiKÇK-ja, që sipas socialistëve synon të vërë nën kontroll pasuritë e prodhuara nga veprimtaritë kriminale.
Pavarësisht se shumë juristë e kanë quajtur këtë akt normativ në shkelje të Kushtetutës dhe të drejtës së pronës, kreu i qeverisë ka gjetur rastin që të sulmojë sot analistët, që sipas tij ushqehen prej krimit.
Postimi i Ramës:
Jo vetëm PD po edhe plot të ashtuquajtur analistë e komentatorë po i kundërvihen antiKÇK-së, në një përçartje kolektive brenda kutisë së televizorit! Sepse për ta krimi është ushqimi i politikës e audiencave së tyre kundër qeverisë dhe mes krimit e qeverisë ata zgjedhin krimin.
Ligji Special është frymëzuar nga dashuria për këtë vend dhe vullneti i hekurt për të shkatërruar burimet financiare të krimit, duke marrë shembull nga historitë e suksesit të vendeve si Italia e Britania e Madhe që me ligjet speciale goditën në zemër mafian apo terrorizmin.
Koha do të provojë përsëri edhe njëherë se dashuria për vendin, vullneti për ta bërë shtet modern Shqipërinë, vendosmëria për t’i rënë me kokë mureve të vjetra, do të fitojnë mbi hipokritët, dembelët e parazitët që jetojnë me llafe, gënjeshtra e broçkulla duke helmuar shqiptarët!
Po ashtu dje, Rama sulmoi dhe partinë Demokratike, duke thënë se nuk ka ndërmend ta luftojë krimin, madje do ta përdorë atë për të ardhur në pushtet.
(E.K/Faxweb.al)
