E ftuar në Opinion, Mesila Doda tha se PDIU është e gatshme që të ndërmjetësojë tryezën e dialogut mes Edi Ramës dhe Lulzim Bashës.
“PDIU ofrohet për të organizuar tryezën e dialogut mes Ramës dhe Bashës. Zgjedhje pa opozitën nuk ka. Por edhe LSI nuk ka arsye të mbetet e mbërthyer në një formulë”,- u shpreh Doda.
“Nuk mund të hyjmë në zgjedhje me opozitë të emëruar. Para disa vitesh ka qenë mazhoranca e sotme në opozitë që kërkonte garanci dhe zgjedhjet u shtynë. Vazhdoj të mendoj që pa opozitën nuk ka proces normal”, -shtoi Doda.
Ndërkohë nënkryetari i LSI-së, Luan Rama ka deklaruar se qëndrimi i LSI-së; për një qeveri besimi dhe zgjedhje me opozitën është një qëndrim parimor dhe kushtetues njëkohësisht.
Sipas tij, Levizja e Dhjetorit e vitit ’90 përmbysi një regjim pa zgjedhje për të shkuar dhe instaluar një sistem demokratik dhe me zgjedhje.
I pyetur nga gazetari Blendi Fevziu, nëse populli mund të votojë një opozitë tjetër, Rama theksoi se opozita nuk mund të klonohet, pikërisht për shkak të faktorizimit që i bën populli me votën e vet.
Ai tha se opozita për të hyrë në zgjedhje, kërkon garanci që zgjedhjet do të jenë demokratike dhe në përputhje me standardet e OSBE-ODIHR-it.
“LSI deklaron se vendi ka nevojë për një qeveri të besimit, për zgjedhje të gjithëpranuara nga të gjithë, që do të garantojë mospërfshijen e administratës në zgjedhje, sidomos Policisë së Shtetit, garantimin e luftës kundër drogës dhe çdo përpjekjeje kriminale për përfshirje në zgjedhje. Reforma zgjedhore është një kusht i domosdoshëm për realizimin e një gare zgjedhore me kushtë të barabarta”, deklaroi dje Meta nga Kryesia e LSI. (M.D/ Shuplaka)
Discussion about this post