Veteranët e Luftës Nacional-Çlirimtare në Shkodër kanë dalë në protestë kundër vendimit të Voltana Ademit për të përjashtuar 29 Nëntorin, datën e çlirimit të Shqipërisë, nga kalendari i festimeve në Shkodër.
Një grup veteranësh kanë marshuar sot në rrugët e qytetit veriperëndimor kundër kësaj vendimmarrje duke e cilësuar si absurde dhe fyese për të rënët në luftën nacionalçlirimtare.
Kryetari i kësaj shoqate në Shkodër, Zamir Llazani është shprehur se kjo festë është zyrtare, ndaj dhe Bashkia duhet të marrë masa për organizimin e aktiviteteve, sidomos në këtë përvjetor të 75-të të çlirimit të vendit.
Debati mes partive të djathta dhe të majta vijon prej më shumë se 2 dekadash në lidhje me datën e çlirimit të Shqipërisë. PD ndërsa ishte në pushtet kishte si festë zyrtare të çlirimit datën 28 Nëntor, e njëjta dhe për shpalljen e Pavarësisë. Nga krahu tjetër socialistët shprehen se data kur ‘iku gjermani i fundit’ nga Shqipëria është 29 Nëntori 1944 dhe me sa duket ky debat do të vijojë dhe këtë nëntor, por vetëm në Bashkinë e Shkodrës.
Discussion about this post