Pak ditë pas ngjarjes së rëndë shënuar në burgun e Rrogozhinës, ku 22-vjeçari Estref Halili u vetëvar, reagimet kanë qenë të shumta. Në dëshminë e tij, babai i Estrefit, Ardian Halili, ka treguar se si rodhën ngjarjet dhe ç’mendon ai lidhur me vetëvarjen e të birit.
Ai ka rrëfyer për një të përditshme online se pasi u la i lirë në Shkurt 2016, i riu u arrestua prapë pasi u kap me cigare me hashsash që nuk ishte e tij. “Tani, më 22 dhjetor, dy djem futen në grupin e shokëve të djalit e si rastësisht e pyesin për një cigare që djali kishte pasur në dorë. Ai u ka thënë se ka në përbërje edhe hashash. Ata kishin qenë policë të veshur civilë, por djali nuk e dinte.”, është shprehur Ardian Halili, i cili ka treguar se policët ishin të veshur si civilë.
Në vijim të rrëfimit të tij për një portal online, babai i 22-vjeçarit ka folur për telefonatën e fundit që familjarët patën me Estrefin. Sipas tij, në asnjë cast të bisedës me të ëmën dhe vëllanë, Estref Halili nuk kishte lënë të kuptohej se do të ndërmerrte këtë akt të rëndë.
“Dukej i ngarkuar emocionalisht dhe vazhdonte të pyeste pse e kishin vënë në pranga. Ndihej keq. Folëm me të një ditë para se të ndodhte kjo. Por asgjë nuk kuptuam apo të na paralajmëronte vendimin e tij.”, ka treguar babai i 22-vjeçarit.
I pyetur nëse i biri kishte shenja depresioni, ai shprehet se jo, por ishte djalë me sedër dhe ndihej në faj për vitet e dënimit që kishte vuajtur për një vepër penale që nuk e kishte kryer: “Mendonte se na e kishte ulur kokën te njerëzit. Por kur ne i thamë se ai kishte bërë hap fisnik dhe se kishte mbuluar shokët, sikur u ndje më i qetë dhe po e harronte atë pjesë. Tani i ra kjo, befasisht fare.”
Babai i 22-vjeçarit që u vetëvar disa ditë më parë në burgun e Rrogozhinës ka kërkuar vendosjen e drejtësisë, “të gjykohen e të vihen në pranga ata që i morën jetën djalit në lule të moshës”.
Discussion about this post