Pas lajmit se një kryefamiljar shqiptar në Gjermani i kishte dhënë fund jetës duke u hedhur nga ura pasi autoritetet gjermane kishin vendosur ta dëbonin së bashku me bashkëshorten dhe djalin e tij, ka reaguar dhe deputeti i Partisë Demokratike Agron Shehaj.
Përmes një postimi në ‘Facebook’ Shehaj ka shkruar se kjo ngjarje e preku shumë, ndërsa pyet nëse vendi ynë është më keq se vdekja.
Postimi i plotë:
Më preku shumë lajmi i kryefamiljarit që vrau veten sepse nuk donte që familja e tij të kthehej në Shqipëri.
A është ky vend më keq se vdekja?
A është ky vend më i tmerrshëm se vendimi për të hequr dorë nga jeta, për të lënë fëmijët në mëshirë të fatit?
Atë familje për të cilën do jepje dhe jetën, por jo në këtë mënyrë. Qëndrojini pranë atyre që kanë nevojë, edhe pse janë të shumtë. Ndonjëherë edhe një fjalë mjafton për t’i dhënë shpresë dikujt.
E di që shumë do thonë që këtu nuk ka më shpresë, por ja që ka. E di që ka… Të mendojmë për kthesën.
Duhet kurajë, qëndresë dhe punë e secilit, që të ndërtojmë një shoqëri HUMANE, në një Shqipëri për të gjithë, jo vetëm për disa.
(B.H/Faxweb)
