Sadetin Fishta, kryetar i sindikatës së punonjësve të policisë, i ftuar në ‘’Fax News” ka komentuar Vetingun në rradhët e uniformave blu.
Ai u shpreh se organizata policore ka një sërë problemesh sidomos në aspektin e drejtimit dhe të organizimit. Sipas Fishtës është e qartë se drejtorët më të lartë të policisë janë emërime politike, dhe se dhe vartësit e tyre janë propozuar në të njëjtën mënyrë.
‘’Ne themi që Vetingu është një domosdoshmëri një nevojë në mënyrë që të kapërcejë këtë periudhë të vështirë nga tranzicioni deri në ditët që ne flasim. Policia ka qenë e përdorur nga të gjitha forcat politike sipas objektivave që ato kanë pasur.
Vetingu është si një check up, në fillim duhet që të përcaktohet diagnoza, duke kaluar në një sitë ne do përcaktojmë edhe sesa ka qenë e ndikuar Policia nga kriminalitetit. Dhe më pas do kalojmë te faza e dytë që është rimëkëmbja.
Deri më tani Drejtorët e Policisë kanë qenë të emëruar nga ana e politikës, dhe emërimet që ata kanë bërë në shkallët e tjera ka qenë po njësoj. Kjo faktohet dhe nga çështjet e shumta të fituara në Gjykata nga ana e Policëve që janë liruar nga detyra.
Kjo i ka shkaktuar Buxhetit të Shtetit shifra shumë të larta dëmesh. Deri më tani drejtorët e Policisë nuk kanë mundur që të komunikojnë si duhet me vartësit e tyre, po funksionojnë vetëm në nivel urdhërash.
Ka pasur emërime nga lart poshtë, ku mungon fryma kolegjiale. Ne duhet të heqim dorë nga drejtorët urdhëdhënës. Drejtori i Policisë duhet që të marrë mendimin e të gjitha strukturave.
Këto kanë qenë katër vitet më të errëta të Policisë shqiptare. Policia është lënë jashtë nga disa aksione të rëndësishme, për shkak se në rradhët e Policisë ka pasur njerëz që kanë pasur lidhje me trafikun e drogërave.”, u shpreh Fishta.
(E.L/FAXWEB)
