KPK ka shkarkuar kreun e gjykatës se Tropojës, Dritan Seci. Vendimi për shkarkimin e Secit, u mor mëngjesin e ditës së sotme. Secit iu gjetën parregullsi në deklarimin e pasurisë ndërkohë që u vlerësua pozitivisht për pastërtinë e figurës.
Trupa gjykuese e KPK-së kryesohej nga Roland Ilia, me relator Olsi Komicin dhe anëtare Valbona Sanxhaktarin.
Sipas Komisionit të Pavarur të Kualifikimit kishte dyshime për fshehjen e një apartamenti si dhe një borxh prej 20 mijë eurosh në emër të gjyqtarit Dritan Seci, ndërkohë që ky i fundit u mbrojt me argumentin se apartamentin e kishte kthyer mbrapsht dhe se nuk e njihte personin që deklaronte se i ka dhënë borxh.
Komisioni ka gjetur gjithashtu se Seci kishte kontrata për pagimin e energjisë elektrike dhe të ujit për një apartament në rrugën e Durrësit, me sipërfaqe 75 m2. Sipas relatorit, Seci ka pretenduar se e kishte përdorur këtë apartament në pronësi të një mikut të tij pa qera dhe se kishte paguar vetëm faturat e ujit dhe të energjisë. Nga hetimi rezultoi se mes tyre është nënshkruar fillimisht një kontratë shit-blerjeje, për të cilën gjyqtari kishte paguar 4 mijë euro.
Kryetari i Gjykatës së Tropojës është përballur edhe me një tjetër gjetje të Komisionit, lidhur me një deklaratë noteriale nga një person për dhurimin 20 mijë eurove për shpenzime familjare dhe vetjake.
Relatori Komici pohoi se subjekti ka mohuar ta ketë nënshkruar këtë deklaratë dhe njohjen me personin me inicialet B.M, por KPK ka gjetur se ky shtetas kishte udhëtuar drejt Kosovës me makinën e përdorur nga Seci.
Për aspektin profesional, pavarësisht raportit pozitiv të KLD-së që e ka vlerësuar me aftësi të mira organizative, etike e profesionale, hetimi administrativ i KPK-së ka zbuluar disa probleme. Në adresë të gjyqtarit Seci ka pasur tre ankesa, njëra prej të cilave ka rezultuar pa probleme. Në një prej çështjeve ka rezultuar se gjyqtari ka ndryshuar cilësimin e palëve pa dhënë shpjegim dhe pa marrë një vendim të ndërmjetëm. Në një tjetër rast, ka përfunduar shqyrtimin gjyqësor pa njoftuar njërën pale, duke i hequr të drejtën e ankimit.
Discussion about this post