Pas vendimit të Gjykatës Kushtetuese për ligjin e Vettingut, ka reaguar delegacioni i BE-së, pas tij edhe ambasada e SHBA-së në Shqipëri.
Si BE, ashtu edhe ambasada amerikane shprehin mbështetjen e tyre ndaj vendimit të gjykatës për ta shpallur ligjin e Vettingut në përputhje me Kushtetutën.
Në njoftimin e saj, ambasada e SHBA-së u bën thirrje partive politike që të respektojnë vendimin e gjykatës.
“Ambasada e SHBA në Tiranë mirëpret vendimin e Gjykatës Kushtetuese për ligjin e vetingut. I bëjmë thirrje të gjitha partive politike të respektojnë vendimin e Gjykatës. Gjithashtu, nxisim udhëheqësit shqiptarë të punojnë me shpejtësi për të zbatuar të gjitha reformat historike të sistemit të drejtësisë në Shqipëri. Një reformë kuptimplotë që i largon gjykatësit dhe prokurorët e korruptuar nga sistemi gjyqësor gëzon mbështetjen e publikut të gjerë dhe është një prioritet kryesor i Shteteve të Bashkuara në Shqipëri”, thuhet në deklaratën e ambasadës.
Ndërsa Bashkimi Europian, inkurajon autoritetet shqiptare të nisin me shpejtësi zbatimin e vlerësimit të gjyqtarëve dhe prokurorëve, pasi e konsideron atë si thelbësor për përparimin e procesit të integrimit.
“Bashkimi Evropian i kushton vëmendje të veçantë vendimit të sotëm të Gjykatës Kushtetuese për shpalljen e ligjit të vetingut në përputhje me kushtetutën e Shqipërisë. BE-ja i inkurajon autoritetet shqiptare të nisin me shpejtësi zbatimin e vlerësimit të gjyqtarëve dhe prokurorëve. Kjo është thelbësore për përparimin e procesit të anëtarësimit të Shqipërisë në BE dhe është pritur gjatë nga qytetarët shqiptarë. Komisioni Evropian do ta mbështesë Shqipërinë për kryerjen e një procesi vetingu tërësor dhe të besueshëm, duke udhëhequr Operacionin Ndërkombëtar të Monitorimit.”, shkruhej në deklaratë. (D.D/Shuplaka)
