Rreth 15 banorë të 4 familjeve në zonën pranë shkollës “Petro Nini” në Tiranë kanë dalë prej orëve të para të mëngjesit në rrugë përpara shtëpive të tyre duke u përballur me përmbaruesit të cilët kishin mbërritur për të prishur banesat e tyre, për shkak se tokës ku i kanë ndërtuar banesat që vitet ’70 i ka dalë pronari.
Banorët këmëngulin se Aleksandër Gavoci, ka korruptuar gjyqtarët për të marrë pronën e tyre, ndërsa shumë prej famijarëve kanë kaluar gjendje të fikti gjatë konfrontimeve me përmbaruesit dhe punonjësit e policisë.
Banorët e kanë përshkallëzuar rezistencën e tyre duke hedhur edhe vezë drejt punonjësve të Përmbarimit të cilët ndodheshin pranë banesave të tyre për të ekzekutuar vendimin.
Por ajo çfarë ka rënë në sy është se rezistencës së tyre u janë bashkuar edhe banorë të tjerë që jetojnë aty afër si dhe qytetarë të tjerë të Tiranës të cilët janë sensibilizuar me këta banorë, të cilët kanë sjellë vezë, bidona me ujë duke qëlluar në drejtim të përmbaruesve të cilët përpiqeshin të hynin me forcë ne banesat e 4 familjeve.
Ndërkohë, tanimë punonjësit e përmbarimit janë tërhequr nga zona dhe pas kësaj ka reaguar edhe njëra nga banoret e cila u tërhoq zvarrë nga punonjësit e policisë gjatë ditës së sotme.
“Fëmija im që është 4 vjeç edhe sikur ta humb këtë fëmijë vetëm Zotit i përmbahem. Sot ikën por jam e sigurtë se do vijnë prap dhe nëse do vijnë të jenë të sigurtë se do të jemi më shumë. Qytetarët e thjeshtë po na bashkohen sepse janë njerëz me sakrifica, me rroga të vogla që vijnë e qajnë hallin me ne”, tha nëna e 4 vjeçares e cila është edhe në muajin e 6-të të shtatzanisë.
(F.GJ/Faxweb.al)
Discussion about this post